მესამე მოწმეა, რომელმაც დაადასტურა წითელი "ჯიპის" იქ ყოფნა, რომელსაც შეეძლო ლევან დადუნაშვილის მკვლელობა მაინც აეცილებინა, კონფლიქტში რომ ჩარეულიყო - განაცხადა "ჯი-ეიჩ-ენთან" ხორავას ქუჩაზე მოკლული დავით სარალიძის მამამ, ზაზა სარალიძემ.
როგორც ის განმარტავს, მანქანის მეპატრონე მოზარდების კონფლიქტს თვალს ადევნებდა, თუმცა, მათ დასახმარებლად არაფერი იმოქმედა. მისივე თქმით, აღნიშნული პიროვნების პასუხისგებაში მისაცემად სახელმწიფო ბრალდება შესაბამის ზომებს არ ატარებს.
"სამწუხაროდ, ის იჯდა მანქანაში და ამ ყველაფერს უყურებდა. ეს მოწმე ხორავას ქუჩაზე ერთ-ერთი მაღაზიის მფლობელია, ის ფანჯრიდან რაღაც დეტალებს უყურებდა.
აღნიშნულმა მოწმემ პროცესზე თქვა, რომ წითელი "ჯიპის" მეპატრონეს შეეძლო ინციდენტში ჩარეულიყო და არ ჩაერიაო. მოწმე აცხადებს, რომ ინციდენტს ფანჯრიდან 3-4 წამის განმავლობაში უყურებდა, შემდეგ კი გარეთ გამოვედიო, ლევან დადუნაშვილი გზაში შეხვდაო, მუცელზე ხელი ედო, სისხლიანი არ დამინახავსო, ეზოში რომ შევირბინე, ამ დროს დათო დააწვინესო.
ფაქტია, რომ ამ მოწმემ რაღაც-რაღაცები დამალა და შეცვალა, პროკურატურამ მისი წინასწარ დატრენინგება მოასწრო. აღნიშნული მოწმე ხედავდა დავით სარალიძე ფარდულთან რომ იდგა და აქეთ-იქით ორი პიროვნება ედგა, ის ამ ორი პიროვნების მოქმედებას არ აკონკრეტებს,ვერ ვხედავდი, ვერ დავინახე, ჩხუბობდნენ თუ რას შვებოდნენო. მან დამალა ის ფაქტი, რომ ჩხუბობდნენ. არადა, ამ კაცმა მანამდე ისაუბრა, თუ როგორ ურტყამდნენ დათოს დანას აქეთ-იქიდან. ახლა კი უარყო", - აცხადებს სარალიძე.
ცნობისთვის, პირველ დეკემბერს, ხორავას ქუჩაზე მოზარდებს შორის სისხლიან გარჩევას, ორი არასრულწლოვნის სიცოცხლე ემსხვერპლა.
