ამ საქმეში გამოძიებულიც კი არ არის მესამე დანის მონაწილეობა, რაც გამოძიების ეტაპზე დადასტურებულია - განაცხადა ჟურნალისტებთან ხორავას ქუჩაზე მოკლული დავით სარალიძის მამამ, ზაზა სარალიძემ.
როგორც ის განმარტავს, პროკურატურა გარდა ორი დაკავებული ბრალდებულისა, საქმეში არსებულ სხვა სავარაუდო დამნაშავეების პასუხისგებაში მიცემას არ გეგმავს.
"რა მოცემულობაც ჰქონდა პროკურატურას თავიდანვე, რომ ეს ორი ბრალდებული წარადგინა სასამართლოში, ამ ორ ბრალდებულს მიიყვანს ბოლომდე, სხვას არაფერს არ გამოკვეთს. იდენტიფიცირებულია რამდენიმე დამნაშავეა თუნდაც, დანაშაულის დაფარვაში და შეუტყობინებლობაში, მაგრამ სამწუხაროდ, პროკურატურის მხრიდან ამაზე რეაგირება არ ყოფილა. იმედია, განაჩენის დადგომის შემდეგ მაინც მიხედავენ ამ საქმეს ბოლომდე. ძალიან მეეჭვება, რომ ეს ყველაფერი გააკეთონ, მაგრამ მაინც ვიტოვებ იმედს, რომ პროკურატურა და ძალოვანი სტრუქტურები გონს მოეგებიან და ამ საქმეს ბოლომდე მიიყვანენ ისე, როგორც ეს საჭიროა", აცხადებს სარალიძე.
ის დარწმუნებულია, რომ შესაძლო დამნაშავეებს ხელს პროკურატურა აფარებს.
"დარწმუნებული ვარ, რომ პროკურატურა რამდენიმე ადამიანს მფარველობს და ამ რამდენიმე ადამიანიდან გამომდინარე, მფარველობს ყველა იმ პირს, ვინც ამ ინციდენტში მიიღო მონაწილეობა, რადგან გარკვეულწილად ყველა დამნაშავეა ვინც ამ კონფლიქტში მონაწილეობდა. ამ საქმეში გამოძიებულიც კი არ არის მესამე დანის მონაწილეობა, რაც გამოძიების ეტაპზე დადასტურებულია.
კონფლიქტი მოსაგვარებელი იყო თვითონ 51-ე სკოლაში და ამაში უცხო პირების ჩარევა არ იყო საჭირო, მაგრამ მაინც ჩაერივნენ სამწუხაროდ და მოჰყვა კიდეც სავალალო შედეგი. გარდაცვლილია ჩემი შვილი და ლევან დადუნაშვილი", - დასძენს დაზარალებული.
კითხვაზე, დააყენებს თუ არა პროკურატურა ყოფილი პროკურორის, მირზა სუბელიანის პასუხისმგებლობის საკითხს, სარალიძე პასუხობს, რომ ეეჭვება ასე მოხდეს.
"ჩემი ვარაუდით არ მგონია, რომ დააყენოს, თუმცა მირზა სუბელიანის პასუხისმგებლობის საკითხი დასაყენებელია გუშინდელი პროცესიდან გამომდინარე, როდესაც მისი მეუღლის დის შვილმა დაადასტურა მირზა სუბელიანის ვიზიტი მათთან ოჯახში, შემთხვევიდან რამდენიმე საათში, ჯერ კიდევ მაშინ, როდესაც ჯერ კიდევ არ იყვნენ გადამალულები მ.კ. და ერთ-ერთი ბრალდებული. დანაშაულის დაფარვაზე წესით მისი პასუხისმგებლობის საკითხი უნდა დადგეს, მაგრამ ამას რამდენად იზამს პროკურატურა ვერ გეტყვით", - აღნიშნავს სარალიძე.
ცნობისთვის, პირველ დეკემბერს, ხორავას ქუჩაზე მოზარდებს შორის სისხლიან გარჩევას, ორი არასრულწლოვნის სიცოცხლე ემსხვერპლა.