ახალგაზრდებს მინდა ვთხოვო, ნუ იქნებიან ინდეფერენტულნი ნურც ერთი პრობლემის მიმართ, - ამის შესახებ საქართველოს პრემიერ-მინისტრმა გიოირგი კვირიკაშვილმა ახალციხეში, „სახელმწიფო და ადგილობრივი ხელისუფლების ინსტიტუციური დიალოგის“ პირველ ყოველწლიურ ფორუმზე განაცხადა.
მისი თქმით, „ჩვენი სურვილია, რომ ახალგაზრდები, რომლებიც მიიღებენ საუკეთესო განათლებას მსოფლიოს საუკეთესო უნივერსიტეტებში, ისინი იყვნენ მოტივირებული, რომ წავიდნენ და თავიანთ რეგიონებს, თავიანთ სოფელს, თავიანთ რაიონს ემსახურონ“.
პრემიერ-მინისტრმა იმედი გამოთქვა, რომ „სახელმწიფო და ადგილობრივი ხელისუფლების ინსტიტუციური დიალოგის“ ყოველწლიური ფორუმის ინიციატივა დინამიურ განვითარებას ჰპოვებს და მასში აქტიურად ჩაერთვებიან, როგორც ადგილობრივი თვითმმართველობის ორგანოები, ასევე მოსახლეობა, განსაკუთრებით ახალგაზრდები.
„განსაკუთრებით ახალგაზრდებს მინდა ვთხოვო, ნუ იქნებიან ინდეფერენტულნი ნურც ერთი პრობლემის მიმართ. თქვენი აქტივობა, ძვირფასო ახალგაზრდებო არის კრიტიკულად მნიშვნელოვანი ჩვენი ქვეყნის განვითარებისთვის. თქვენი აქტივობა ჩვენ გვაძლევს ენერგიას და თქვენი თამამი გადაწყვეტილებების მიღების უნარი, რა თქმა უნდა, ხელისუფლებასაც ძალიან სჭირდება“, – განაცხადა კვირიკაშვილმა.
