მან გამოხატა სურვილი, ვინც გამოხატავს სურვილს და ვინც ფლობს გამოძიებასთან დაკავშირებით ინფორმაციას, ბუნებრივია, ყველა ეს პირი გამოიკითხება, მათ შორის ზვიად დევდარიანიც, - ამის შესახებ შინაგან საქმეთა მინისტრის მოადგილე ნათია მეზვრიშვილმა სიდას-ს ყოფილ ხელმძღვანელ ზვიად დევდარიანთან დაკავშირებით განაცხადა.
მეზვრიშვილის თქმით, ადევნების მუხლით დაწყებულ საქმეზე შსს-სთვის არავის მიუმართავს.
„როცა გამოძიება დავიწყეთ, მოვუწოდეთ ყველას, მათ შორის მსხვერპლებს, არასამთავრობო ორგანიზაციებს, რომლებიც ფლობენ ინფორმაციას მსხვერპლების შესახებ, მათ შორის, ჟურნალისტებს, რომლებსაც აქვთ კონკრეტული ინფორმაცია, რომ მოგვაწოდონ ინფორმაცია, მოუწოდონ მსხვერპლებს, რომ ითანამშრომლონ გამოძიებასთან.
სხვაგვარად, ჩვენ გაგვიჭირდება ამ ადამიანების ვინაობის დადგენა. ამ ეტაპამდე, სურვილი არავის გამოუთქვამს.
ვინც მოგვმართავს, ის იქნება საგამოძიებო დანაყოფში დაბარებული და მოხდება დაუყონებლივ მათი გამოკითხვა.
ჩვენ როდესაც განცხადება გავავრცელეთ, ყველას მოვუწოდეთ, არა მხოლოდ მსხვერპლებს, არამედ იმ ადამიანებსაც, ვინც იციან, ვინ არიან ეს მსხვერპლები, რომ მოგვაწოდონ ინფორმაცია, რათა ჩვენ დროულად ჩავატაროთ საგამოძიებო მოქმედებები“, – განაცხადა მეზვრიშვილმა.
ცნობისთვის, გუშინ ზვიად დევდარიანმა პრესკონფერენციაზე განაცხადა, რომ ის სამართლებრივ ბრძოლას იწყებს.
შეგახსენებთ, 17 მარტს „ტაბულამ“ 4 ქალის ისტორია გამოაქვეყნა, რომლებიც არასამთავრობო ორგანიზაცია CIDA-ს დირექტორს და საზოგადოებრივი მაუწყებლის მეურვეთა საბჭოს კანდიდატად წარდგენილ ზვიად დევდარიანს სექსუალურ შევიწროებაში ადანაშაულებენ.
ისტორიების გამოქვეყნებამდე დევდარიანი სექსუალურ ძალადობაში ქალთა მოძრაობამ დაადანაშაულა და სახალხო დამცველს პარლამენტიდან მისი კანდიდატურის გამოწვევა სთხოვა.
დევდარიანი საზოგადოებრივი მაუწყებლის მეურვეთა კონკურსს თავად გამოეთიშა, რასაც სახალხო დამცველი მიესალმა.
ზვიად დევდარიანის წინააღმდეგ შსს-მ გამოძიება ადევნების მუხლით დაიწყო.