არანაირი დათმობა არ იქნება ამ მიმართულებით, მით უმეტეს, როდესაც საქმე ეხება პატარებს და მშენებლობას, აქ ვიქნებით უკომპრომისოები, - ამის შესახებ თბილისის მერმა კახა კალაძემ, რომელმაც დღეს 33-ე ბაღი დაათვალიერა, ჟურნალისტებს განუცხადა.
მისი თქმით, ვაშლიჯვარში 33-ე ბაგა-ბაღში მშენებლობის პროცესის დაწყების შემთხვევაში, ბავშვები შესაძლოა, სხვადასხვა ბაღებში გადანაწილდნენ.
ვაშლიჯვარში 33-ე ბაგა-ბაღი გასული წლის შემოდგომაზე გაიხსნა, თუმცა, ბაღში უკვე ბზარები არსებობს.
თბილისის მერმა მის მოადგილეს დაავალა, ბაღში სამშენებლო სამუშაოების მწარმოებელი კომპანია „გიკოს“ წარმომადგენლები დაიბაროს და შესაბამისი პასუხი მოსთხოვოს.
კალაძე აცხადებს, რომ მშენებლობის ჩაბარებისას ხელშეკრულებაში მოთხოვნილი არ იყო ხარისხის ექსპერტიზა. კახა კალაძის თქმით, მომავალში ყველა პროექტის განხორციელებისას ხარისხს დიდი მნიშვნელობა მიენიჭება.
„შეუძლებელია ჩვენ თავი დავუხაროთ ასეთ მშენებლობებს და ასეთ ხარისხს, რაც გვაქვს. მომდევნო წლების განმავლობაში ძალიან დიდი ყურადღება დაეთმობა ხარისხიან მშენებლობებს. მე მესმის, რომ თავიდან პრობლემები იქნება და მოგვიწევს ბრძოლა, მაგრამ დარწმუნებული ვარ, რომ ამას გადავტეხავთ. არანაირი დათმობა არ იქნება ამ მიმართულებით, მით უმეტეს, როდესაც საქმე ეხება პატარებს და მშენებლობას, აქ ვიქნებით უკომპრომისოები. ეს იქნება ყველა მიმართულებით არამარტო საბავშვო ბაღების მიმართულებით, გზებთან დაკავშირებით, სარეაბილიტაციო სამუშაოებთან დაკავშირებით და სხვა“, - განაცხადა კახა კალაძემ.
