ამ წუთებში, თბილისის საქალაქო სასამართლო ყაზბეგის გამზირზე, წითელ ბაღთან ორი მოზარდის დაჭრის საქმეზე ბრალდებულისთვის აღკვეთის ღონისძიების შეფარდებაზე მსჯელობს.
„მოცემულ შემთხვევაში, ყველაზე მნიშვნელოვანი ისაა, რომ დაზარალებული ბავშვები თავს კარგად გრძნობენ და მათი მდგომარეობა მძიმე არ არის. თავად არასრულწლოვანი გამოცხადდა საგამოძიებო ორგანოებში, მან ითანამშრომლა, დანაშაულის იარაღი თავად მიუთითა, აქედან გამომდინარე, ყველა წინაპირობა არსებობს, რომ არ დააპატიმრონ. თუმცა სასამართლო რა გადაწყვეტილებას მიიღებს, ვერაფერს მოგახსენებთ“, - განაცხადა პროცესის დაწყებამდე არასრულწლოვანის ადვოკატმა, ირმა ჭკადუამ.
ცნობისთვის, აღნიშნულ ფაქტთან დაკავშირებით დაკავებულ არასრულწლოვანს ბრალი გუშინ წაუყენეს.
შეგახსენებთ, რომ მიმდინარე წლის 31 იანვარს, თბილისში, ალ.ყაზბეგის გამზირზე, წითელი ბაღის ტერიტორიაზე, ურთიერთშელაპარაკებისას 2 მოზარდს ცივი იარაღით მუცლისა და გულმკერდის არეში ჭრილობა მიაყენეს, ერთ არასრულწლოვანს კი, ხელზე აქვს მსუქბუქი ჭრილობა.