ნატო–ში კომპრომისის საფუძველზე გაწევრიანების შესახებ დისკუსია არ მიმდინარეობს, – ამის შესახებ საგარეო საქმეთა მინისტრმა მიხეილ ჯანელიძემ საზოგადოებრივი მაუწყებლის გადაცემა „კვირის ინტერვიუში“ განაცხადა.
მისი თქმით, საქართველოს აქვს ყველა პრაქტიკული ინსტრუმენტი, რომელსაც ის ნატო–ს წევრობამდე მიჰყავს. მისივე თქმით, ნატო-ს ზოგიერთი წევრი შიშობს, რომ საქართველოს ალიანსში მიღება მოსკოვის მიერ ოკუპირებული ცხინვალისა და აფხაზეთის რეგიონების გამო, რუსეთთან ავტომატურ ომს გამოიწვევს.
მინისტრმა აქვე განმარტა, რომ ნატო–ში გასაწევრიანებლად საჭიროა, საქართველომ პრაქტიკული ინსტრუმენტები მაქსიმალურად ეფექტურად გამოიყენოს.
„პრაქტიკული ინსტრუმენტია ნატო–საქართველოს კომისია, სადაც შესაბამის დონეზე ყველა მნიშვნელოვანი, პოლიტიკური თუ პრაქტიკული საკითხის განხილვა რეგულარულად ხდება. პრაქტიკული ინსტრუმენტია ნატო–საქართველოს არსებითი პაკეტი, რომელიც საქართველოს კონკრეტული მიმართულებებით აძლიერებს და ნატო–ს სტანდარტებთან თავსებადს ხდის.
პრაქტიკული ინსტრუმენტია ასევე ეროვნული ყოველწლიური პროგრამა, რომელიც საქართველოს ეკონომიკური განვითარების, დემოკრატიული ინსტიტუტებისა და ქვეყნის თავდაცვის ნატო–ს სტანდარტებთან თავსებადობას უზრუნველყოფს“, – განაცხადა ჯანელიძემ, რომელმაც აქვე აღნიშნა, რომ საქართველოს ტერიტორიულ მთლიანობასთან და სუვერენიტეტთან დაკავშირებით ნატო–ს პოზიცია ძალიან მტკიცე, ურყევია და ეს ორგანიზაცია საქართველოს ტერიტორიული მთლიანობისა და სუვერენიტეტის ერთ–ერთი გარანტია.
