გერმანიის ბუნების დაცვისა და ბიომრავალფეროვნების კავშირი აფხაზ ეკოლოგებთან თანამშრომლობას აპირებს. ამის შესახებ სეპარატისტული აფხაზეთის მედია იუწყება.
სეპარატისტული აფხაზეთის ე. წ. პრემიერ-მინისტრი სერგეი შამბა გერმანიაში მოქმედ ბუნების დაცვისა და ბიომრავალფეროვნების საკითხზე მომუშავე ორგანიზაციის დელეგაციას შეხვდა. აფხაზური მხარის ინფორმაციით, გერმანული ორგანიზაცია "ნაბუს" პრეზიდენტმა ლეიფ მილერმა შამბას განუცხადა, რომ მათი ვიზიტი აფხაზეთში განპირობებულია იმით, რომ ორგანიზაციას კავკასიაში თავისი გეგმები აქვს. მისი თქმით, ორგანიზაციის წარმომადგენლობა უკვე გახსნილია ადიღეში. აფხაზური მხარის ინფორმაციით, გერმანული დელეგაციის წარმომადგენლებმა რიწის ტბა და მიმდებარე ტერიტორია დაათვალიერეს.
გვინდა, აფხაზეთი უფრო ცნობილი და აღიარებული გახდეს. ვიცით, რომ აფხაზეთს აქვს პრობლემები აღიარებასთან დაკავშირებით, მაგრამ ჩვენ, როგორც დამოუკიდებელი ორგანიზაცია, ვეცდებით, აფხაზეთის ბუნებრივი ნაკრძალები მოხვდეს მსოფლიო ბუნებრივი მემკვიდრეობის "დასავლეთ კავკასია" ობიექტთა შორის. ეს მოქმედებები აფხაზეთის საერთაშორისო აღიარებას გამოადგება", - განაცხადა, სეპარატისტული აფხაზეთის მედიის ინფორმაციით, მილერმა.
მისი თქმით, მათთან ერთად აფხაზეთში ვერ წავიდა გერმანული პარტია "მწვანეთა პარტია საიუზ 90"-ის თავმჯდომარე, ვინაიდან გერმანიის საგარეო საქმეთა სამინისტრომ მას აფხაზეთში რუსეთის მხრიდან ჩასვლის უფლება არ მისცა და მიუთითა, რომ იგი საქართველოს ტერიტორიის გავლით უნდა შესულიყო.
აფხაზური მხარის ინფორმაციით, გერმანული დელეგაცია დაჰპირდა შამბას, რომ აფხაზეთის თემას მედიაში წამოწევს იმისთვის, რათა აფხაზეთის დელეგაციას გერმანიაში ჩასვლის უფლება მიეცეს.