საქართველოს ყოფილი პრეზიდენტი ჰოლანდიის ვიზის მიღების შესახებ ინფორმაციას არც უარყოფს და არც ადასტურებს. ამასთან, სააკაშვილმა უკრაინულ მედიასთან განაცხადა, რომ მას არ სჭირდება ვიზა.
„მოქალაქეობის თაობაზე რამდენიმე ევროპული ქვეყნისგან და მათი წამყვანი პოლიტიკოსებისგან მაქვს შეთავაზება, მაქვს სამუშაო მოწვევა ამერიკაში და ევროპის რამდენიმე ქვეყანაში. ამის პრობლემა მე არ მაქვს“, - განაცხადა სააკაშვილმა.
კითხვაზე, მიიღო თუ არა მან ჰოლანდიის ვიზა, მიხეილ სააკაშვილმა განაცხადა, რომ ვინაიდან მისი ოჯახი ჰოლანდიიდანაა, მას ავტომატურად აქვს უფლება ამგვარ ვიზაზე.
ნიდერლანდის სამეფომ მიხეილ სააკაშვილს ვიზა მისცა. ამის შესახებ ადგილობრივი გამოცემა Telegraaf იტყობინება. გავრცელებული ინფორმაციით, „ახალი ძალების მოძრაობის“ ლიდერმა ვიზა კიევში ჰოლანდიის საელჩოს მეშვეობით მიიღო, რაც ჰოლანდიის უშიშროებისა და მართლმაჯულების სამინისტრომ უკვე დაადასტურა. უწყების ინფორმაციით, ვიზა სააკაშვილზე იმ მოტივით გაიცა, რომ საქართველოს ექსპრეზიდენტი ჰოლანდიის მოქალაქის, სანდრა რულოვსის ქმარია, მასთან ორი შვილი ჰყავს და „ოჯახის გაერთიანების“ უფლებით სარგებლობს.
