„სააკაშვილს ვერ დავუკავშირდი, მისი საკონტაქტო არ მაქვს, ვერ მოვიძიე, მაგრამ მის ოჯახს წერილობით შევატყობინე რომ საქალაქო სასამართლოში მის ინტერესებს მე წარმოვადგენ. წერილში ჩემი ტელეფონის ნომერი, მისამართი მივუთითე, მაგრამ არავინ დამკავშირებია“, - განუცხადა „ჯი-ეიჩ-ენს“ ყოფილი პრეზიდენტის, მიხეილ სააკაშვილის ადვოკატმა, სოფიო გოგლიჩიძემ.
კითხვაზე, სააკაშვილის ყოფილი ადვოკატები, ბექა ბასილაია და დავით კაკოიშვილი დაეხმარნენ თუ არა მას ყოფილ პრეზიდენტთან დაკავშირებაში, ადვოკატი პასუხობს, რომ სააკაშვილის თანხმობის გარეშე ისინი ვერ დაეხმარებდონენ.
„ვერ დამეხმარნენ, ჩემსა და ჩემი დაცვის ქვეშ მყოფს შორის კომუნიკაცია ვერ შედგა. ისინი სააკაშვილის ნომრებს ალბათ, მისი თანხმობის და ამ საკითხის გავლის გარეშე ვერ მომცემდნენ“, - აცხადებს გოგლიჩიძე.
ადვოკატი ვარაუდობს, რომ ხვალ, დღის ბოლომდე საქმის მასალების გაცნობას და დასკვნითი სიტყვის მომზადებას ვერ მოასწრებს, რის გამოც, დიდი ალბათობით, ის სხდომის გადაებას მოითხოვს.
„ისევ საქმის მასალების გაცნობის ეტაპზე ვარ. თუ ვერ მოვასწარი ბოლომდე გაცნობა და სავარაუდოდ, ვერ მოვასწრებ, სხდომის გადადებაზე შუამდგომლობას დავაყენებ“, - დასძინა გოგლიჩიძემ.
შეგახსენებთ, 14 დეკემბერს, თბილისის საქალაქო სასამართლოში საქართველოს ყოფილ პრეზიდენტს, მიხეილ სააკაშვილს საზოგადოებრივი ადვოკატი დაენიშნა. სააკაშვილმა ქართულ მართლმსაჯულებას უნდობლობა გამოუცხადა და შეთანხმებით აყვანილ ადვოკატებზე უარი განაცხადა.
სააკაშვილს სანდრო გირგვლიანის მკვლელობის საქმის ერთ-ერთ ეპიზოდზე სახელმწიფო ბრალება უფლებამოსილების ბოროტად გამოყენებას ედავება.
