როცა მთავარი საფრთხე ივანიშვილი გასაძევებელია ქვეყნიდან, ამ დროს ერთმანეთზე გადაკიდება-გადმოკიდება და წივილ-კივილი სრულიად არასერიოზულია, - განაცხადა ბაჩო ახალაიამ ე.წ. მატროსოვის ციხიდან შაბათის კურიერთან ენმ-ის დაშლაზე საუბრისას.
,,არ ვიცი, რატომ დაიშალა ერთიანი ნაციონალური მოძრაობა. მე ვფიქრობ, რომ ძალიან არასწორი საქციელი იყო, მაგრამ რატომ დაიშალა, იმათ უნდა ჰკითხოთ, ვინც დაშალა. მიზეზი მეათეხარისხოვანია მერწმუნეთ იმიტომ, რომ მთავარი ამოცანა ივანიშვილია. ის ამ გზით ყველაფერს აკეთებს და იმტკიცებს ძალაუფლებას. როცა საჭირო იყო, ერთი-ორი პატარა, უმნიშვნელო ადამიანის მარგინალიზაციას ახდენდა, როცა საჭირო იყო მთელი გუნდისას. ყოფს, ანაწილებს, ამას აკეთებს. ვინ რა მოტივით წავიდა, ჩემთვის მეათეხარისხოვანია. არაგონივრული და არაკეთილსინდისიერი საქციელია, ბევრი რომ არ ვილაპარაკო იმიტომ, რომ მთავარი საფრთხე, ივანიშვილი, ამ სიტყვის პირდაპირი მნიშვნელობით გასაძევებელია ქვეყნიდან და ამ დროს ერთმანეთზე გადაკიდება-გადმოკიდება და წივილ-კივილი სრულიად არასერიოზულია. რა მნიშვნელობა აქვს, რა მოტივი ამოძრავებს ნებისმიერ. თუ არაკეთილსინდისიერი მოტივი ამოძრავებთ, მით უმეტეს, კიდევ უარესი“, - განაცხადა ბაჩო ახალაიამ.