„მინდა, ადვოკატთა ასოციაციაში ბევრი რაღაც შეიცვალოს, თითოეული წევრი უნდა იყოს ჩართული პრიორიტეტების განსაზღვრაში, ადვოკატებმა თავად უნდა გადაწყვიტონ რაში უნდა დაიხარჯოს გრანტები და თანხები“, - განუცხადა „ჯი-ეიჩ-ენს“ ადვოკატთა ასოციაციის თავმჯდომარეობის ერთ-ერთმა კანდიდატმა, ირმა ჭკადუამ.
როგორც ჭკადუა აცხადებს, ასოციაციაში ყველა პროცესი გამჭირვალე უნდა იყოს და ფინანსების განკარგვაში ადვოკატები უნდა იყვნენ ჩართულები.
„ნამდვილად არ მაქვს პრეტენზია იმასთან დაკავშირებით, ვინ რამდენ მივლინებაში წავიდა. ჩემი საუბარი ფინანსებთან მიმართებაში მხოლოდ და მხოლოდ შემდეგს შეეხება, არც 10-მა და არც 15-მა ადამიანმა არ უნდა გადაწყვიტოს ასოციაციის თანხები რაში და როგორ დაიხარჯოს. ყველაფერი გამჭირვალე უნდა იყოს და ფინანსების განკარგვაში ყველა ადვოკატი უნდა იყოს ჩართული“, - განაცხადა ჩკადუამ.
მისი თქმით, წინასაარჩევნო კამპანია პრაქტიკულად არ უწარმოებია.
,, ძალიან სუფთა ხელებით და სუფთა გულით მსურს, ბევრი რამ შეიცვალოს და ადვოკატები უშუალოდ თვითონ იყვნენ მართვაში ჩართულები. ადვოკატთა ასოციაციას დღეს ძალიან ბევრი გამოწვევა აქვს.
ადვოკატთა ასოციაციას არაჩვეულებრივი თავმჯდომარე, ჰყავდა - ბატონი ზაზა ხატიაშვილი. მეც რომ ამირჩიონ ბატონი ზაზას სადარი ვერ ვიქნები, რადგან ის იყო დაუღალავი, 24 საათის განმავლობაში იდგა ადვოკატების გვერდით. ნურავის ეგონება, რომ იგივე კომფორტში იცხოვრებენ ადვოკატები, თუკი, აირჩევენ, მაგალითად, ასათიანს, ლანჩავას, ან ჯანაშიას. ხატიაშვილი შუაღამეც მზად იყო გასულიყო ციხესთან, ყინვაში მდგარიყო, სხვადასხვა საპროტესტო აქციები ეტარებინა, განცხადებები ეკეთებინა, იგივეს არცერთი წარმოდგენილი კანიდიდატი არ, ვერ გააკეთებს“, - აცხადებს ჭკადუა.
ის დასძენს, რომ მსგავსი კურსის შენარჩუნებას თავადაც შეეცდება.
„მე მუდმივად ვარ ყველა იმ ადვოკატის გვერდით, რომელსაც კი ოდესმე პრობლემა ჰქონია. თუკი, არჩეული ვიქნები, ვეცდები, ეს კურსი შევინარჩუნო“, - აღნიშნა ჭკადუამ.
დღეს სოციალურ ქსელში ადვოკატთა ასოციაციის არჩევნებს ნიკა გვარამია გამოეხმაურა. ის ადვოკატთა ასოციაციის წვერია. გვარამია ჭკადუას განცხადებაში კორუმპირებულ და უცოდინარ ოცნების მარიონეტად მოიხსენიებს და დასძენს, რომ კენჭისყრაზე მის წინააღმდეგ ხმის მისაცემად წავა.
აღნიშნულს ჭკადუაც გამოეხმაურა და აღნიშნა, რომ მისთვის შეურაცხმყოფელიც კი იქნებოდა, გვარამია მისი მხარდამჭერი რომ ყოფილიყო.
