„ორი მოწმე დაიკითხა. ეს ადამიანები იმ დროს, შინაგან საქმეთა სამინისტროს, დიდუბის პოლიციის მე-3 განყოფილების თანამშრომლები იყვნენ. აღნიშნულ მოწმეებს საქმესთან დაკავშირებით სასამართლოსთვის არაფერი ღირებული ინფორმაცია არ მიუწოდებიათ. ჩემთვის გაუგებარია, ბრალდების მხარემ საერთოდ რატომ მოიყვანა ისინი. მოწმეებს საერთოდ არაფერი უთქვამთ გურამ დონაძის, ან რომელიმე ბრალდებულის ბრალეულობაზე. ორივე მოწმემ თქვა, რომ გურამ დონაძე იქ არ უნახავთ, როცა ადგილზე მივიდნენ, დონაძე უკვე წასული იყო. სიმართლე გითხრათ, დაცვის მხარეს მათთვის კითხვაც კი არ დაგვისვამს“, - განუცხადა სასამართლო პროცესის შემდეგ „ჯი-ეიჩ-ენს“ გურამ დონაძის ადვოკატმა, მალხაზ ველიჯანაშვილმა.
როგორც ადვოკატი განმარტავს, დაკითხული მოწმეების უმეტესობა იტყუება.
„არიან მოწმეები, რომლებიც არაფერს არ ადასტურებენ და არიან მოწმეთა კატეგორია, რომლებიც პირდაპირ იტყუებიან, ეს დადასტურებულია. ერთ-ერთმა მოწმემ განაცხადა, რომ იარაღი არ უნახავს, მაშინ როცა ვიდეოში ჩანს, რომ მას იაღარი ხელში უჭირავს. ძნელია, ასეთ მოწმეს დაუჯერო“, - აცხადებს ველიჯანაშვილი.
რაც შეეხება მოლოდინს, როგორც ადვოკატი აღნიშნავს, მასაც და ბრალდებულსაც გამამართლებელი განაჩენის მოლოდინი აქვთ.
„სასამართლოს ერთადერთი, სწორი გზა აქვს დარჩენილი, რომ ბრალედბულები, მათ შორის, გურამ დონაძე წარდგენილ ბრალდებაში გაამართლოს, თავად ბრალდებულსაც ეს მოლოდინი აქვს“ , - დასძნა ველიჯანაშვილმა.
მომდევნო პროცესი 16 დეკემბერსაა ჩანიშნული. როგორც ადვოკატი აცხადებს, ძირითადი მოწმეები დასაკითხი არიან.
შეგახსენებთ, რომ დღეს თბილისის საქალაქო სასამართლოში ბუტა რობაქიძის მკვლელობის საქმის ფიგურანტების პროცესი მიმდინარეობდა. საქმე ეხება რობაქიძის სიცოცხლის მოსპობისას შინაგან საქმეთა სამინისტროს მაღალჩინოსნების მხრიდან უფლებამოსილების გადამეტების ეპიზოდს.
