სახელმწიფო უსაფრთხოების სამსახურის ხელმძღვანელის, ვახტანგ გომელაურის განცხადებით, არსებობს ეჭვი, რომ სპეცოპერაციის დროს გარდაცვლილ პირთა შორის ახმედ ჩატაევი იყოს, თუმცა, დაზუსტებული პასუხი ჯერ კიდევ არ არსებობს.
გომელაურის თქმით, დაზუსტებული პასუხი ექსპერტიზის შემდეგ გახდება ცნობილი.
„ეჭვი არის, რომ გარდაცვლილთა შორის არის ახმედ ჩატაევი, თუმცა დაზუსტებული პასუხი ექსპერტიზის შემდეგ გვექნება იყო თუ არა ეს პიროვნება ახმეტ ჩატაევი. იყო ოპერატიული ინფორმაციები და მასშტაბური საფრთხეები ავიცილეთ თავიდან”, - განაცხადა ვახტანგ გომელაურმა და დასძინა, რომ საგამოძიებო მოქმედებებში ჩართული არიან ექსპერტები აშშ-დან.
სახელმწიფო უსაფრთხოების სამსახურის ხელმძღვანელი 22 ნოემბერს სპეცოპერაციის დროს გარდაცვლილი სპეცრაზმელის სამოქალაქო პანაშვიდზე იმყოფება.
მან დაღუპულის ოჯახის წევრებს კიდევ ერთხელ მიუსამძიმრა, გაწეული სამსახურისთვის სპეცრაზმელებს, სახელმწიფო უსაფრთხოების სამსახურის თანამშრომლებს, შს სამინისტროს თანამშრომლებს, ექიმებსა და სამაშველო სამსახურის წარმომადგენლებს მადლობა გადაუხადა.
დაღუპულ სპეცრაზმელ ივანე გოლოშვილს დღეს, მუხათგვერდის ძმათა სასაფლაოზე დაკრძალავენ.