საქართველოს საპატრიარქო სპორტის სასახლეში დაგეგმილი დევიდ ჰეთევეის გამოსვლებთან და ქადაგებასთან დაკავშირებით განცხადებას ავრცელებს და საკუთარ მრევლს ღონისძებაზე დასწრებისგან თავის შეკავებას ურჩევს.
საქართველოს საპატრიარქოს აცხადებს, რომ საზოგადოებაში მუსირებს არასწორი აზრი, თითქოს სწავლება, რომელსაც იგი ავრცელებს მართლმადიდებლობასთან კავშირშია, რაც სინამდვილეს არ შეესაბამება.
"ბატონი დევიდ ჰეთევეი არის ერთ-ერთი ქრისტიანული დენომინაციის - ევანგელისტების წარმომადგენელი. ეს მიმდინარეობა დაახლოებით ორი საუკუნეა რაც დაარსდა და თავისი არსით ყოვლად მიუღებელია როგორც მართლმადიდებელთათვის ისე მრავალსაუკუნოვანი ტრადიციული ქრისტიანული აღმსარებლობებისათვის", - ნათქვამია საპატრიარქოს განცხადება.
საპატრიარქო აცხადებს, რომ საქართველო ყოველთვის იყო და არის ტოლერანტული ქვეყანა, სადაც ყველა რელიგიურ მიმდინარეობას აქვს შეკრების, აღმსარებლობისა და სიტყვის თავისუფლება, რასაც ისინი თავის სამლოცველოებში დაუბრკოლებლად ანხორციელებენ, მაგრამ ”ის, რაც ამ დღეებში სპორტის სასახლეშია დაგეგმილი არის აშკარა მაგალითი პროზელიტიზმის ანუ მცდელობა ადამიანების ფართო მასების თავის რწმენაზე გადაბირებისა. პროზელიტიზმი კი, საერთაშორისო რელიგიათშორისი კონვენციებითაც და ქრისტიანული ეთიკიდან გამომდინარეც დაგმობილია".
"საქართველოში, ქვეყანაში სადაც ეკლესიას 20 საუკუნოვანი ისტორია აქვს მართლმადიდებლობის უარმყოფელი სწავლების წარმომადგენლის მიერ ქრისტიანობის ასეთი საჯარო ქადაგება არის ყოვლად მიუღებელი და შეურაცხმყოფელი ქმედება", _ ნათქვამია განცხადებაში.
საპატრიაქო მიმართავს საქართველოს ეკლესიის მრევლს, თავი შეიკავონ ამ და მსგავს რელიგიურ შეხვედრებში მონაწილეობისაგან.
