ესპანეთის ეროვნული სასამართლო კოლეგიის გადაწყვეტილებით, კატალონიის მთავრობის ყოფილი რვა წევრი დააკავეს. დაკავებულებს შორის კატალონიის მთავრობის თავმჯდომარის ყოფილი მოადგილე ურიოლ ჟუნკერასია.
მათ ბრალად ედებათ ამბოხება და სახელმწიფო სახსრების გაფლანგვა. ესპანეთის კანონმდებლობა აღნიშნული დანაშაულისთვის 30 წლით თავისუფლების აღკვეთას ითვალისწინებს.
სასამართლომ მიიჩნია, რომ ეჭვმიტანილებს შეეძლოთ სხვა ქვეყანაში გადასვლა, როგორც ეს კატალონელმა სხვა მინისტრებმა გააკეთეს.
კატალონიის მთავრობის ყოფილმა ხელმძღვანელმა კარლეს პუჩდემონმა ესპანეთის ხელისუფლებას მოსთხოვა, დაუყოვნებლივ გაათავისუფლონ კატალონიის მთავრობის რვა ყოფილი წევრი.
„როგორც კატალონიის მთავრობის ლეგიტიმური თავმჯდომარე, კატალონიის მთავრობის დაკავებული მინისტრების გათავისუფლებას მოვითხოვ“, - განაცხადა კარლეს პუჩდემონმა ტელეარხ TV3-სთვის მიცემულ ინტერვიუში.
მისი თქმით, მთავრობის ყოფილი წევრების დაკავება „დემოკრატიის ხელყოფასა და კატალონიაში დეკემბერში ჩასატარებელ საპარლამენტო არჩევნებზე დარტყმას წარმოადგენს“.
