რუსეთის პრეზიდენტის პოსტზე ვლადიმერ პუტინის შეცვლისთვის ორი ჟურნალისტი ქალი იბრძოლებს. ქსენია სობჩაკს კონკურენტი დღეს გამოუჩნდა. საპრეზიდენტო არჩევნებში კენჭისყრის სურვილი ამჯერად ცნობილმა ჟურნალისტმა და უფლებადამცველმა ეკატერინა გორდონმა გამოთქვა.
„ალბათ, ერთადერთი კანდიდატი ვიქნები, ვისი კანდიდატურაც პრეზიდენტის ადმინისტრაციასთან არ იქნება შეთანხმებული,“-აცხადებს პრეზიდენტობის მომავალი კანდიდატი.
მანამდე ცნობილი გახდა, რომ ტელეწამყვანი ქსენია სობჩაკი 2018 წლის საპრეზიდენტო არჩევნებში მიიღებს მონაწილეობას. ის ამ დრომდე, ერთადერთი ქალი კანდიდატი იყო.
აღსანიშნავია, რომ ცოტა ხნით ადრე, ვლადიმერ პუტინმა ფორუმზე საუბრისას არ გამორიცხა, რომ რუსეთის შემდეგი პრეზიდენტი ქალი გახდეს. ამან კიდევ უფრო გაამყარა პოლიტიკურ წრეებში გამოთქმული მოსაზრებები, რომ სობჩაკი კრემლის სატელიტი კანდიდატია და მის საარჩევნო კამპანიაზე ხელისუფლება იმუშავებს. თუმცა, პრეზიდენტობისთვის ბრძოლის ასპარეზზე, დღეს ეკატერინა გორდონიც გამოჩნდა.
2018 წლის საპრეზიდენტო არჩევნებში პუტინის კამპანიასთან დაკავშირებით, პრეზიდენტის პრესმდივანმა განაცხადა, რომ კრემლში ეს საკითხი ჯერ არ დგას დღის წესრიგში.
