კატალონიის ლიდერი მინისტრთა კაბინეტის სხდომას დაესწრო. შეხვედრა დამოუკიდებლობის მომხრე კატალონიელი მაღალჩინოსნებისა და ლიდერების დაკავების ორდერის გაცემის პარალელურად გაიმართა.
ჟორდი სანჩესისა და ჟორდი კუიშარის დაკავების ბრძანება ესპანეთის პროკურატურამ გასცა. მათ ბრალი უკანონო რეფერენდუმის მომზადებაში, მის განხორციელებასა და საპროტესტო აქციების ჩატარებაში ედებათ.
ჟენერალიტეტის პრეზიდენტის, კარლეს პუჩდემონის განცხადებით, ესპანეთი კატალონიის სამოქალაქო საზოგადოების ლიდერებს მშვიდობიანი დემონსტრაციების ორგანიზებისთვის აკავებს, რაც სხვა არაფერია, თუ არა პოლიტიკური ნიშნით დევნა.
