საქართველოს სურს, რომ რუსეთმა ტვირთების მონიტორინგის შესახებ შეთანხმების პირობები ცალმხრივ ფორმატში შეასრულოს. ამის შესახებ რუსეთის საგარეო საქმეთა მინისტრის მოადგილემ, გრიგორი კარასინმა სააგენტო რია ნოვოსტისთვის მიცემულ ინტერვიუში განაცხადა.
„დოკუმენტი რუსეთსა და საქართველოს ავალდებულებს შვეიცარიული კომპანიის მონაწილეობით სავაჭრო ნაკადების სპეციალური საბაჟო ადმინისტრირების წესი გამოიყენონ. სამწუხაროდ, თბილისის პოზიცია არ შეცვლილა. მათ სურთ, რუსეთმა შეთანხმება ცალმხრივად შეასრულოს, ხოლო საკუთარ ვალდებულებებზე საუბარიც კი არ სურთ. ასე არ გამოვა. თბილისს მოვუწოდებთ საერთაშორისო ვალდებულებების კეთილსინდისიერად შესრულებისკენ“, - აღნიშნა კარასინმა.
2011 წლის 9 ნოემბერს ჟენევაში შვეიცარიის კონფედერაციის შუამავლობით საქართველოსა და რუსეთის მთავრობებმა დოკუმენტების პაკეტს მოაწერეს ხელი. მხარეები საბაჟო ადმინისტრირებისა და სასაქონლო ბრუნვის მონიტორინგის მექანიზმის ძირითადი პრინციპების შესახებ შეთანხმდნენ. ურთიერთგაგების მემორანდუმი შვეიცარიის, როგორც ნეიტრალური მესამე მხარის როლის განმტკიცებას ითვალისწინებს. საქართველომ, რუსეთმა და შვეიცარიამ ასევე გაცვალეს დოკუმენტები იმ საერთაშორისოდ აღიარებული ნეიტრალური კერძო კომპანიის მოქმედების პირობების განსაზღვრის მიზნით, რომელსაც მონიტორინგის განხორციელების მანდატს შვეიცარიის მთავრობა მიანიჭებს.
