რეჯეფ თაიფ ერდოღანი თურქეთსა და აშშ-ს შორის არსებულ დიპლომატიურ კრიზისში თურქეთში აშშ-ის ელჩს ჯონ ბასს ადანაშაულებს. მისი თქმით, ელჩმა ვიზების გაცემის შეჩერების გადაწყვეტილება ცალმხრივად მიიღო. თავის მხრივ, სახელმწიფო დეპარტამენტში აცხადებენ, რომ ჯონ ბასს ამ გადაწყვეტილების მიღების დროს შეერთებული შტატების მთავრობის სრული თანხმობა ჰქონდა.
„ჩვენ მას თურქეთში შეერთებული შტატები წარმომადგენლად აღარ განვიხილავთ. ჩვენ არ დავთანხმდებით, რომ ელჩი გამოსამშვიდობებელი მიზნით მინისტრთა კაბინეტს ეწვიოს“ - განაცხადა თურქეთის პრეზიდენტმა.
სახელმწიფო დეპარტამენტის ინფორმაციით კი, ელჩმა გადაწყვეტილება ამერიკის მთავრობასთან სახელმწიფო დეპარტამენტთან და ქვეყნის ეროვნული უსაფრთხოების საბჭოსთან ერთად მიიღო.
ჯონ ბასი თურქეთში ამერიკის ელჩის თანამდებობაზე 2014 წლის სექტემბერში დაინიშნა. მას ამ ქვეყანაში უფლებამოსილების ვადა ამოეწურა, შესაბამისად, ელჩს ქვეყნის მთავრობის წარმომადგენლებთან გამოსამშვიდობებელი ღონისძიება ჰქონდა დაგეგმილი. თურქეთის შემდეგ, ჯონ ბასი შეერთებული შტატების ელჩის თანამდებობას ავღანეთში დაიკავებს.
