ე.წ ციანიდის საქმეზე, მსჯავრდებულ დეკანოზ გიორგი მამალაძეს ადვოკატი გიორგი ფანცულაია შეხვდა. მან ციხის შენობა რამდენიმე წუთის წინ დატოვა. როგორც ადვოკატმა „ჯი-ეიჩ-ენს“ განუცხადა, დეკანოზი საკვების და მედიკამენტების მიღებაზე ისევ უარს აცხადებს.
„გუშინ გიორგი მამალაძეს არ მიეცა საშუალება, რომ ტელეფონით ოჯახს დაკავშირებოდა. ამის გამო მან საკვების მიღებაზე უარი განაცხადა. ციხის ადმინისტრაცია ეუბნებოდა, რომ ტელეფონი გაფუჭებული არ იყო და ამას თავად იგონებდა, მოგვიანებით კი სამინისტრომ თავისივე განცხადებაში დაადასტურა, რომ წვიმის გამო გაფუჭდა ტელეფონი. თვითონვე აკეთებენ ურთიერთსაწინააღმდეგო განცხადებებს.
როცა მომხდარზე ჟურნალისტებმა მასალები მოამზადეს, დეკანოზთან ციხის ადმინისტრაციის თანამშრომელი მივიდა და უთხრა, თუ შვილის დაბადების დღე იყო, ვერ მითხარი დაგარეკინებდიო.
რას ნიშნავს ეს? ესე იგი თავის დროზეც შეეძლოთ და არ დაარეკინეს“, - განაცხადა გიორგი ფანცულაიამ.
ადვოკატის თქმით, გიორგი მამალაძეს მიაჩნია, რომ მის უფლებები არაერთი მიმართულებით ირღვევა.
„დეკანოზი თვლის, რომ მასზე ფსიქოლოგიურ ზეწოლას ახორციელებენ, რათა ბრძოლაზე უარი თქვას. ის კვლავ აცხადებს უარს საკვების მედიკამენტების მიღებაზე და როცა ჩათვლის, რომ მისი უფლებები აღარ დაირღვევა, მხოლოდ ამის შემდეგ შეწყვეტს პროტესტის ამ ფორმას.
ამით ის ცდილობს, მომავალშიც არ დაირღვეს მისი უფლებები და ციხის ადმინისტრაციაც ისე მოექცეს, როგორც პატიმრის უფლებებს შეეფერება“, - აღნიშნავს უფლებადამცველი და დასძენს, რომ საკვებზე და მედიკამენტებზე უარის თქმა, მისი ჯანმრთელობისთვის ნამდვილად საზიანოა.
„როგორც მოგეხსენებათ, მას ჯანმრთელობა რთულ მდგომარეობაში აქვს. ადამიანს შვიდი თვის განმავლობაში სატელეფონო საუბრის უფლება არ ეძლეოდა, ახლა მისცეს, შვილისთვის დაბადების დღე უნდა მიელოცა და ესეც არ გააკეთებინეს. ეს მისთვის დამთრგუნველია, თუმცა არავითარ შემთხვევაში არ შეწყვეტს ბრძოლას“, - განაცხადა ადვოკატმა.