"საქართველოს რკინიგზის" გენერალურმა დირექტორი მამუკა ბახტაძემ, დღეს ეკონომიკისა და მდგრადი განვითარების მინისტრ გიორგი გახარიასთან, თურქეთის ტრანსპორტის, საზღვაო საქმეთა და კომუნიკაციების მინისტრ აჰმედ არსლანთან და აზერბაიჯანის რკინიგზის ხელმძღვანელ ჯავიდ ყურბანოვთან ერთად ბაქო-თბილისი-ყარსის სარკინიგზო ხაზის ინსპექტირების მიზნით, თბილისიდან კარწახამდე მატარებლით იმგზავრა.
ბახტაძის განცხადებით, არის მოლოდინი, რომ დაახლოებით, 2 თვეში პირველი მატარებლის გატარება იქნება შესაძლებელი.
,,ვფიქრობთ, რომ დაახლოებით, 2 თვეში მზად ვიქნებით, გავატაროთ პირველი სატვირთო მატარებელი. რაც შეეხება სამგზავრო გადაყვანებს, ამას სჭირდება კიდევ დამატებითი ინფრასტრუქტურის მოწყობა და ახალი მოძრავი შემადგენლობის შესყიდვა. ეს შედარებით საშუალოვადიანი პერსპექტივაა. რაც შეეხება სატვირთო გადაზიდვებს, ჩვენ შევთანხმდით, რომ დაახლოებით, 2 თვეში მივიღოთ პირველი სატვირთო მატარებელი.
არის სურვილი, რომ კომერციული საქმიანობის დაწყება მალე მოხდეს, რადგან ბაზარზე მოთხოვნაა.
ბევრ კლიენტთან გვაქვს ურთიერთობა, რომელიც მზადაა, რომ საზღვაოდან ჩვენს ახალ მარშრუტზე გადმოერთოს და შესაბამისად, ამოცანა დგას ასე, რომ რაც შეიძლება სწრაფად დავიწყოთ სატვირთო გადაზიდვები.
ჩვენ შევეცდებით, ჩვენს თურქ და აზერბაიჯანელ კოლეგებთან ერთად, რომ 2 თვეში მივიღოთ პირველი სატვირთო მატარებელი.
საქართველოს რკინიგზის სატვირთო პოლიტიკის მთავარი ამოცანა იქნება, რომ ამ მარშრუტმა მოიზიდოს დამატებითი ტვირთები დერეფნისთვის და არ წარმოშვას ჩვენი პორტებიდან ტვირთების გადმომისამართება, - განაცხადა ბახტაძემ და დასძინა, რომ ეს საკითხი არაერთხელ დაისვა.
"ჩვენ ძალიან მკაფიოდ ვუპასუხეთ, რომ სატარიფო პოლიტიკაში ჩადებული იქნება ისეთი მექანიზმები, რომლებიც პრიორიტეტს მიანიჭებს დამატებითი ტვირთების მოზიდვას, რომელიც დღეს ძირითადად დადის საზღვაო მარშრუტით და ის ცდება ჩვენს დერეფანს", - განმარტა "საქართველოს რკინიგზის" გენერალურმა დირექტორმა.
ახალი სარკინიგზო ხაზის პროექტის ფარგლებში, გათვალისწინებულია მარაბდა-კარწახის 180 კმ სიგრძის სარკინიგზო უბნის რეაბილიტაცია, რეკონსტრუქცია და მშენებლობა. პროექტი შედგება: მარაბდა-ახალქალაქის სარეკონსტრუქციო სარეაბილიტაციო უბნისგან - საექსპლუატაციო სიგრძით 153 კმ და ახალქალაქი-კარწახი (თურქეთის საზღვარი) - 27კმ სიგრძის ახალი სამშენებლო უბნისგან.
მარაბდა-ახალქალაქი-კარწახის სარკინიგზო უბნის რეაბილიტაცია, რეკონსტრუქცია და მშენებლობა წელიწადში 5 მლნ ტონა ტვირთბრუნვაზე და 1 მლნ. მგზავრთნაკადზე გათვლილი პროექტის შესაბამისად (წელიწადში 15 მლნ ტონა ტვირთბრუნვის პერსპექტივით) მიმდინარეობს. პროექტის მიხედვით, თანამედროვე ტექნოლოგიების გამოყენებით, გათვალისწინებულია არსებულ სარკინიგზო ხაზზე ყველა დარგის ობიექტების სრული რეაბილიტაცია-რეკონსტრუქცია. ბაქო-თბილისი-ყარსის ახალი სარკინიგზო ხაზის ამოქმედების შემდეგ შეიქმნება ევროპა-აზიის ახალი დამაკავშირებელი სარკინიგზო მარშრუტი, რომელიც ხელს შეუწყობს საქართველოს, როგორც სატრანზიტო ქვეყნის პოტენციალის ამაღლებას. ეს არის პროექტი, რომელმაც სამი ქვეყნის ერთობლივი ძალისხმევით რეგიონი უნდა აქციოს სატრანსპორტო და სავაჭრო ჰაბად, რომელიც მნიშვნელოვან როლს შეასრულებს ახალი აბრეშუმის გზის პროექტში.
აღსანიშნავია, რომ მსოფლიოს 100 გლობალურ პროექტს შორის, ბაქო-თბილისი-ყარსის რკინიგზა მსოფლიოს ერთ-ერთ სტრატეგიულ პროექტად არის აღიარებული.