მიხეილ სააკაშვილი დღეს კიევში ჩასვლას და ქვეყნის პრეზიდენტის რეზიდენციის წინ ბრიფინგის გამართვას გეგმავს. ინფორმაციას მისი პარტია „ახალ ძალთა მოძრაობა „ ფეისბუკის გვერდზე ავრცელებს. მანამდე მიხეილ სააკაშილმა ტელეკომპანია „ნიუს ვანისთვის" მიცემულ ინტერვიუში სასამართლო პროცესზე ისაუბრა. ოდესის ყოფილმა გუბერნატორმა მისთვის წაყენებულ ბრალდებას აბსურდული უწოდა.
"პირველად აღმოვჩნდი უკრაინულ სასამართლოში და სისტემის მთელი „ხიბლი“ საკუთარ თავზე გამოვცადე. ჯერ კიდევ სასამართლოსთან ტიტუშკები დამხვდნენ, ადამიანები, რომლებსაც კრიმინალური წარსული აქვთ. დარბაზი კი მესაზღვრეებით იყო სავსე. მთელი დღე იქ იყვნენ, მაგრამ სასამართლოს დასრულებას არ დაელოდნენ და საღამოს 6 საათზე ყველანი ერთად წავიდნენ. მესაზღვრეები ამ ცირკისთვის გამოიყენეს. უკრაინელ მოქალაქეების მიერ გადახდილი გადასახადები ამ ცირკის მოწყობაზე იხარჯება. მე შემეძლო სასამართლოზე ადვიკატი გამეგზავნა, რადგანაც მხოლოდ ადმინისტრაციული ჯარიმა მემუქრება, მაგრამ პირადად მივედი. ჩვენ საზღვრის უკანონო გადაკვეთაში გვედავებიან, მაშინ, როცა პოლონეთს მხარემ უკვე დაადასტურა, რომ ჩვენი საბუთები წესრიგში იყო და უკრაინაში ლეგალურად მოვხვდით. უბრალოდ, პოროშენკომ განაცხადა, რომ ჩვენ დერეფანი გავარღვიეთ და ახლა სასამართლო ამის დამტკიცებას ცდილობს,"-აღნიშნა სააკაშვილმა.
