უკრაინელი დეპუტატები დავით საყვარელიძეს თავდებში უდგენბიან. უკრაინის გენერალური პროკურორის ყოფილ მოადგილეს, უკრაინის პარტია ”ახალი ძალების მოძრაობის” წევრს, უკრაინის საზღვრის დაცვის და პროკურატურის თანამშრომლები საზღვრის უკანონოდ - ჯგუფურად გადაკვეთის ორგანიზებას ედავებიან.
უკრაინის პარლამენტის დეპუტატი ეგორ სობოლევი ლვოვის სასამართლოს თხოვნით მიმართავს და დავით საყვარელიძეს თავდებში უდგება.
„სასწრაფოდ ლვოვში ჩამოვედი, რათა სასამართლოს ვთხოვო, რომ თავდებში ჩავუდგე დავით საყვარელიძეს. ის გამოძიებაზე გავლენას არ მოახდენს და არც გაქცევას აპირებს“, - წერს ფეისბუქის გვერდზე დეპუტატი.
მისი თქმით, სასამართლოს სხდომის გადადება 18 სექტემბრისთვის უნდათ.
„სასამართლოს ორშაბათისთვის გადადება სურთ. ეს კი აღკვეთის ღონისძიების შერჩევის 72-საათიანი ვადის დარღვევაა“, - განაცხადა დეპუტატმა.
ლვოვში ასევე ჩავიდნენ დეპუტატები: იური დერევიანკო, ვლადიმერ პარასიუკი, ელენე შკრუმი, პავლო კოსტენკო, დიმიტრი დობროდომოვი და ივან კრულკო. პარტია „ახალი ძალების მოძრაობის“ პრესმდივანის მარიანა პოჩტარის თქმით, აღნიშნული დეპუტატები მზად არიან თავდებაში ჩაუდგნენ დავით საყვარელიძეს.
საქმე სისხლის სამართლის კოდექსის 3 მუხლითაა აღძრული: საზღვრის უკანონო გადაკვეთა, ჯგუფური არეულობის მოწყობა და სამართალდამცველებისთვის წინააღმდეგობის გაწევა. ყველა ეს საკითხი, 10 სექტემბერს, საქართველოს მესამე პრეზიდენტის მიხეილ სააკაშვილის მიერ უკრაინა-პოლონეთის საზღვრის გაკვეთას უკავშირდება.
