უკრაინის შინაგან საქმეთა სამინისტროს კოლეგიის წევრი, დეპუტატი ანტონ გერაშენკო იმ პარლამენტარებს ასახელებს, რომლებმაც მიხეილ სააკაშვილთან ერთად საზღვარი გადაკვეთეს.
გერაშენკოს ინფორმაციით, ოდესის ყოფილ გუბერანტორთან ერთად, პოლონეთ-უკრაინის საზღვარი გადაკვეთეს იულია ტიმოშენკომ, სერგეი ვლასენკომ, იური დერევიანკომ, პაველ კოსტენკომ და დიმიტრი დობროდომოვმა. ამას გარდა, მათთან ერთად იმყოფებოდა უკრაინის უსაფრთხოების სამსახურის ყოფილი ხელმძღვანელი ვალენტინ ნალივაიჩენკო.
„დეპუტატის ხელშეუხებლობა არ ვრცელდება სისხლის სამართლის დანაშაულზე - უკრაინის სახელმწიფო საზღვარზე პირების უკანონო გადაყვანაზე“, -ნათქვამია გერაშენკოს განცხადებაში, რომელსაც „ფეისბუქზე“ ავრცელებს.
გერაშენკოს განცხადებით, ამჟამად გამოძიება მუშაობს, დაადგინოს დანარჩენი პირების ვინაობა, რომლებმაც ასევე უკანონოდ გადაკვეთეს უკრაინის საზღვარი.
როგორც გერაშენკო წერს, მათ კანონის შესაბამისად დაეკისრებათ პასუხისმგებლობა.
შეგახსენებთ, 10 სექტემბერს, უკრაინა-პოლონეთის საზღვართან, უკრაინის ტერიტორიაზე მყოფი სააკაშვილის მხარდამჭერები საკონტროლო-გამშვებ პუნქტზე შეიჭრნენ და ის უკრაინის ტერიტორიაზე გადაიყვანეს.
მიხეილ სააკაშვილისა და მისი მხარდამჭერების მიერ უკრაინის საზღვრის გარღვევის ფაქტზე ლვოვის პოლიციამ გამოძიება დაიწყო.
