საქართველოს ყოფილი პრეზიდენტის, მიხეილ სააკაშვილისთვის უკრაინის მოქალაქეობის ჩამორთმევის ფაქტს რუსეთის პრემიერმინისტრი დიმიტრი მედვედევი სოციალურ ქსელ facebook-ში ეხმიანება.
მედვედევი მომხდარს ტრაგი-კომედიას უწოდებს და წერს, რომ შოუ უნდა გაგრძელდეს.
„სააკაშვილის ბედი გასაოცარია: საქართველოს მოქალაქე, საქართველოს პრეზიდენტი, ადამიანი, რომელსაც ჩამოართვეს საქართველოს მოქალაქეობა, შემდეგ უკრაინის მოქალაქე, უკრაინის პრეზიდენტის მეგობარი, ოდესის ოლქის გუბერნატორი, ადამიანი, რომელსაც ჩამოართვეს უკრაინის მოქალაქეობა.
უკრაინის ხელისუფლების თანმიმდევრობა გასაოცარია - საქართველოს ყოფილ პრეზიდენტს უკრაინის მოქალაქეობა მიანიჭეს, შემდეგ გუბერნატორი გახადეს, უკრაინის მოქალაქეობა ჩამოართვეს და საქართველოში ექსტრადირებაზე დათანხმდნენ. ყველაფერი ეს ამ ორი ადამიანის მაღალ მორალურ თვისებებზე მეტყველებს, რომლებმაც ფანტასტიური ტრაგიკომედია გაითამაშეს. შოუ უნდა გაგრძელდეს (Show must go on)..“ - წერს მედვედევი.
შეგახსენებთ, რომ მიხეილ სააკაშვილის უკრაინის მოქალაქეობა პრეზიდენტის ბრძანებით ჩამოერთვა.
მიზეზად მოქალაქეობის მიღების პროცედურის დროს არასწორი ინფორმაციის მიწოდება სახელდება.
