საქართველოს პარლამენტის თავმჯდომარის პირველი მოადგილის, თამარ ჩუგოშვილის განცხადებით, ვენეციის კომისიამ საქმის თავისი ნაწილი გააკეთა და ჯანი ბუკიკიოზე იმაზე მეტი პასუხისმგებლობის დაკისრება, ვიდრე მას ეკისრება, არ არის სწორი.
„ვენეციის კომისიამ თავის ნაწილი საქმის გააკეთა. მან რეკომენდაციები მოგვცა, მოგვცა თავის ექსპერტული მოსაზრებები და ამ პოლიტიკური კინკლაობის გადატანა სტრასბურგსა თუ ვენეციაში და ბატონ ბუკიკიოზე იმაზე მეტი პასუხისმგებლობის დაკისრება, ვიდრე მას ეკისრება, არ არის სწორი. ჩემი აზრით, ზუსტად ამას ნიშნავდა მისი წერილი“,- განაცხადა ჩუგოშვილმა.
შეგახსენებთ, რომ ვენეციის კომისიის პრეზიდენტის ჯანი ბუკიკიოს წერილის მიხედვით, კომისია საკუთარ პოზიციაზე რჩება, რომ გამოსავალი ნაპოვნი უნდა იქნეს დიალოგის გზით, რათა მიღწეულ იქნას ფართო კონსენსუსი.
წერილი "ნაციონალური მოძრაობის“ სახელზეა გამოგზავნილი.
მანამდე კი 15 ოპოზიციური პარტიის წერილი ვენეციის კომისიაში „ნაციონალური მოძრაობიდან“ გაიგზავნა.
