ცეცლხსასროლი იარაღის გამოყენებით ხულიგნობის ჩადენის ფაქტზე დაკავებული დეტექტივ-გამომძებლის, არჩილ დევრიშაძის ადვოკატი, თეიმურაზ ქავშბაია აცხადებს, რომ მისი დაცვის ქვეშ მყოფი წინა საარჩევნო კამპანიის „მსხვერპლია“. ამის შესახებ მან „ჯი-ეიჩ-ენ-თან“ საუბარში განაცხადა.
სახელმწიფო ბრალდება დევრიშაძეს ხულიგნობას ედავება. როგორც პროკურატურის განცხადებაშია ნათქვამი, 21 ივლისს, როცა დევრიშაძე სამსახურებრივ მოვალეობას არ ასრულებდა, მაგრამ ეცვა სამსახურებრივი მაისური, თან ჰქონდა სამსახურებრივ-საშტატო ცეცხლსასროლი იარაღი, მან ქუჩაში მყოფ რამდენიმე პირს სიტყვიერი შეურაცხყოფა მიაყენა და სიცოცხლის მოსპობით დაემუქრა. აღნიშნულ ბრალდებას „ჯი-ეიჩ-ენ-თან“ საუბარში დევრიშაძის ადვოკატი კატეგორიულად უარყოფს.
„ეს სიცრუეა! ჩემი დაცვის ქვეშ მყოფი თავს დამნაშავედ არ მიიჩნევს. რაც შეეხება ბრალდებას, ეს აბსოლუტურად დაუსაბუთებელია, ვინაიდან მსგავს შემთხვევას ადგილი არ ჰქონია. აცხადებენ, რომ დევრიშაძემ ვიღაცის მიმართულებით შეგნებულად გაისროლა, რაც არ მომხდარა. არაერთი მოწმე გვყავს, ვინც ამ ფაქტს შეესწრო და ადასტურებს, რომ არჩილ დევრიშაძეს იარაღი შემთხვევით გაუვარდა“, - აცხადებს ქავშბაია
ადვოკატი მისი დაცვის ქვეშ მყოფის დაკავებას დაზარალებულის მხრიდან პირად ანგარიშსწორებას უკავშრებს.
„გასათვალისწინებელია ის ფაქტიც, რომ სავარაუდო დაზარალებული ციხიდან რამდენიმე თვის წინ გამოვიდა. ის სწორედ დევრიშაძეს ჰყავდა დაკავებული. მან ციხეში 3 წლიანი სასჯელი მოიხადა, 4 წელი კიდევ პირობითი აქვს. მას რა თქმა უნდა, გამომძიებლის მიმართ ინტერესი ჰქონდა. ამას გარდა, მას შემდეგ, რაც ეს ინციდენტი მოხდა, დაზარალებული დევრიშაძის ეზოში შევიდა და მისი 7 წლის ბავშვს სახეში შეაფურთხა და შეაგინა“, -აცხადებს ადვოკატი.
რაც შეეხება იმას, თუ რა პოზიცია აქვს თავად ბრალდებულს, ამაზე ადვოკატი დევრიშაძისთვის ბრალის ოფიციალურად წაყნებამდე არ საუბრობს.
„დეტალებზე ვერ ვისაუბრებ, ჩვენების გახმაურების უფლება არ მაქვს. ჩვენ სასამართლოს მოვუყვებით იმას, თუ რა მოხდა რეალურად. ეს ყველაფერი წინა საარჩევნო მარათონის ნაწილია. უნდათ, რომ დევრიშაძეზე გადატეხონ ჯოხი და თქვან, მოქალაქეებზე ძალადობდა და დავაკავეთო“, - განაცხადა თეიმურაზ ქავშბაიამ.
შეგახსენებთ, რომ არჩილ დევრიშაძე სამართალდამცავებმა 24 ივლისს საკუთარ სახლში დააკავეს. საქმის ძიება სისხლის სამართლის კოდექსის 239-ე მუხლით მიმდინარეობს, რაც ცეცხლსასროლი იარაღის გამოყენებით ჩადენილ ხულიგნობას გულისხმობს.
