სამწუხაროა, რომ გვერდნახევარიან საბიუჯეტო ცვლილებებში ოპოზიცია ვერ გაერკვა, - ასე ეხმაურება დავით ნარმანია საკრებულოს ოპოზიციონერი დეპუტატების განცხადებებს, რომლის მიხედვით, მერია ბიუჯეტის 4 მილიონით გაზრდით წინასაარჩევნოდ მოსახლეობის კეთილგანწყობის მოპოვებას ცდილობს.
,,3 წელზე მეტია ეჭვები აწუხებს ოპოზიციას, განსაკუთრებით საბიუჯეტო ცვლილებების დროს. ძალიან სამწუხაროა ის, რომ გვერდნახევარიან საბიუჯეტო ცვლილებებში ისინი ვერ გაერკვნენ, რასთან გვაქვს საქმე. ჯამურად ჩვენ იმაზე მეტს არ დავხარჯავთ, ვიდრე ეს იყო წინა წელს, ასე რომ, ეს ცვლილებები არჩევნებთან კავშირში არ არის”, - განაცხადა ნარმანია.
მისივე თქმით, თბილისის ბიუჯეტი 4 მილიონი ლარით იზრდება და ეს დაკავშირებულია ადმინისტრაციული მოსაკრებლიდან ბიუჯეტში შემოსავლების ზრდით. ნარმანიამ განაცხადა, რომ ეს თანხები სხვადასხვა ღონისძიებების დაფინანსებაზე გადანაწილდება. პრიორიტეტების მიხედვით განისაზღვრა საბავშვო ბაღების დაფინანსების გაზრდა მათი სხვადასხვა სახის ხარჯების უზრუნველსაყოფად. ასევე ჯანდაცვისა და სოციალური პროგრამები დაფინანსდება, რომლებიც წლის ბოლომდე თანხის დამატებას საჭიროებდნენ.
