ამ წუთებში თბილისის საქალაქო სასამართლოში ე.წ. ციანიდის საქმის განხილვა მიმდინარეობს. დღეს კვლავ ბრალდების მოწმეები, მათ შორის, მეუფე დიმიტრი და პატრიარქის დისშვილი, ქეთევან შიოლაშვილი დაიკითხებიან. პროცესის დაწყებამდე „ჯი-ეიჩ-ენს“ დეკანოზ გიორგი მამალაძის ადვოკატი, გიორგი ფანცულაია ესაუბრა.
„ბრალდების მხარეს დასაკითხთა სიაში 110 მოწმე ჰყავს, აქედან 90 უკვე დაკითხულია. შეგვიძლია ვივარაუდოთ, რომ ის მთავარი მოწმეები, რომლებიც დარჩენილები არიან და არ დაკითხულან, შესაძლებელია, დღეს დაიკითხონ. დასაკითხ მოწმეთაგან გამოვყოფდი, პატრიარქის დაცვის ყოფილ უფროსს, სოსო ოხანაშვილს, ასევე დასაკითხთა სიაში დარჩენილია მეუფე დიმიტრი, მეუფე პეტრე. შემიძლია გიხრათ, რომ არცერთი მოწმისგან არ მაქვს მოლოდინი, რომ რომელიმე მათგანი პროკურატურის პოზიციას გაამყარებს. მოწმე არ არსებობს, რომელიც დანაშაულთან გიორგი მამალაძის რაიმე შემხებლობას დაადასტურებს,“ - განცხადა ფანცულაიამ.
რაც შეეხება იმას, თუ რა მოლოდინი აქვს ამ საქმეზე თავად ბრალდებულ გიორგი მამალაძეს, როგორც მისი უფლებადამცველი ამბობს, დეკანოზი ოპტიმისტურადაა განწყობილი.
„მოლოდინი, მეტ-ნაკლებად გამამართლებელ განაჩენზე გვაქვს. პირდაპირ გეტყვით, გიორგი მამალაძე მაინც ოპტიმისტურად არის განწყობილი, თავისთავად ჩვენც... ჩვენი შანსები სამართლებრივად 100 ნულზეა, ჩვენივე სასარგებლოდ. მოწმე არ არსებობს, რომელიც იტყვის, რომ მამალაძე შორენა თეთრუაშვილის, ან ვინმეს მოკვლას აპირებდა. არც მტკიცებულებები არსებობს. მოსამართლემ გამამტყუნებელი განაჩენი რომ გამოიტანოს, დასაბუთება ხომ უნდა ჰქონდეს? რას უნდა დაეყრდნოს?“ - აღნიშნა გიორგი ფანცულაიამ.