ჩვენთვის, უსაფრთხოების კუთხით გამომწვევი პერიოდია, - განაცხადა ,,ევროპული საქართველოს“ წევრმა სერგი კაპანაძემ ბათუმში, ჟურნალისტებთან საუბრისას. მისი შეფასებით, რუსეთის ქმედებები უფრო აგრესიული ხდება, თუმცა, ხელისუფლების მხრიდან ქმედითი ნაბიჯები არ იდგმება.
"ჩვენთვის უსაფრთხოების კუთხით გამომწვევი პერიოდია. რუსეთის მხრიდან საქართველოს ოკუპაცია, ერთი მხრივ, გრძელდება და მეორე მხრივ, კიდევ უფრო აგრესიული ხდება. ჩვენ ვხედავთ, როგორ იწევს საოკუპაციო ხაზი და არავითარი რეაგირება არ არის საქართველოს მხრიდან. ისინი ამბობენ, რომ რეალურად არაფერი ხდება. ამით რუსეთის ფედერაციას ხელ-ფეხი კიდევ უფრო ეხსნება. ეს ღონისძიებები კარგი საშუალებაა იმისათვის, რომ ინფორმაცია მიწოდებული იყოს საერთაშორისო ორგანიზაციებისათვის და მათი მხრიდან შესაბამისი შეფასებები გაკეთდეს”, - განაცხადა სერგი კაპანაძემ.
მისივე თქმით, ბათუმში გამართულ მე-14 საერთაშორისო კონფერენციის "საქართველოს ევროპული გზის" ფარგლებში ევროპელ კოლეგებთან სხვადასხვა შეხვედრებს გამართავენ, სადაც მცოცავ ოკუპაციაზე განსაკუთრებული ყურადღება გამახვილდება.
