შერიგებისა და სამოქალაქო თანასწორობის საკითხებში სახელმწიფო მინისტრის, ქეთევან ციხელაშვილის განცხადებით, საოკუპაციო ხაზთან შექმნილი მდგომარეობა ძალიან სერიოზული ჰუმანიტარული პრობლემაა.
მისივე თქმით, ეს არის გამოწვევა მთლიანად რეგიონის და ევროპული უსაფრთხოებისთვის.
"ეს არა არის მხოლოდ უსაფრთხოების თვალსაზრისით გამოწვევა, არამედ ეს არის ძალიან სერიოზული ჰუმანიტარული პრობლემა, პირველ რიგში ადგილობრივი მოსახლეობისთვის, რომელსაც პრობლემები ექმნება მიწაზე წვდომის, ოჯახებთან კონტაქტის, სალოცავებზე და სასაფლაოებზე გასვლის. ეს არ არის იმ კონკრეტული ადამიანების პრობლემა, რომლებიც ცხოვრობენ მართულხლართებთან, ეს არის მთლიანად ჩვენი საზოგადოებისთვის ძალიან მტკივნეული საკითხი. ეს არ არის გამოწვევა მხოლოდ საქართველოს უსაფრთხოებისთვის, ეს არის გამოწვევა მთლიანად რეგიონის და ევროპული უსაფრთხოებისთვის. საქმე არ გვაქვს ერთ ბანერთან, საქმე გვაქვს ჩვენ სერიოზულ სამხედრო სიმძლავრეებთან, რომელიც ამ ბანერების უკანაა განთავსებული. შესაბამისად ჩვენი პოლიტიკა კონფლიქტის მშვიდობიანი მოლაპარაკების, რომელიც თავის მხრივ დეოკუპაციას მოიცავს, არის ძალიან პრინციპული. პირველ რიგში ეს გულისხმობს საერთაშორისო მხარდაჭერის მუდმივ და ძალიან მტკიცე მობილიზებას საქართველოს სამშვიდობო პოლიტიკის მიმართ, დეოკუპაციის ამოცანების ირგვლივ, ჩვენი ყველა შეხვედრის ნომერ პირველი საკითხი დღის წესრიგში გახლავთ სწორედ საოკუპაციო ხაზთან არსებული მდგომარეობა", - განაცხადა ციხელაშვილმა.