საოკუპაციო ხაზის ცენტრალურ მაგისტრალთან მიახლოებას ექსპერტი მამუკა არეშიძე გამოეხმაურა.
„ამ ყველაფერს დიდი ხნის განმავლობაში ვპროგნოზირებდი. ვამბობდი, რომ ჩვენი ცენტრალური მაგისტრალი დარტყმის ქვეშ იყო. როგორც ვხედავ, ყველაფერი სწორედ იქით მიდის, რომ მაგისტრალის ბლოკირება მოახდინონ. ეს შეიძლება დღეს და ხვალ არ მოხდეს, მაგრამ ფაქტია, რომ ამისთვის მზადება წლებია მიმდინარეობს“ - აცხადებს „ჯი-ეიჩ-ენთან“ საუბარში მამუკა არეშიძე.
მისი თქმით, ამ საკითხში საერთაშორისო თანამეგობრობა ვერაფერს შეცვლის.
„ისინი ამ საქმეში დიდი ხანია ჩართულები არიან, მაგრამ რუსები ვერ აიძულეს მათ მიერვე ხელმოწერილი ხელშეკრულება შეასრულონ. შეიძლება ხელისუფლება რბილი შეფასებებით გამოირჩევა, მაგრამ წინა ხელისუფლების დროს მკაცრი შეფასებები რომ იყო, რამე შეიცვალა? მთავარი შეფასებები არ არის, მთავარია რა ტიპის გეგმა დაიდება და ამის განხორციელება როგორ მოხდება“ - აცხადებს არეშიძე.
ექსპერტი იმ ინტერესებზეც საუბრობს, რომელიც რუსეთის ხელისუფლებას საქართველოს მისამართით გააჩნია.
„რუსეთის ხელისუფლებას გარკვეული ინტერესები აქვს, რომლის დაკმაყოფილებაც უნდა. ეს ინტერესები ჩვენთვის ასე თუ ისე, ცნობილია. ეს შეეხება საქართველოს ორიენტაციის ცვლილებას და იმას, რომ საქართველოს ტერიტორიაზე არ ჩატარდეს ისეთი წვრთნები, რომელიც რუსეთის ინტერესების საწინააღმდეგო იქნება. საქართველო ამას ვერ გააკეთებს და ეს მოსკოვშიც კარგად იციან. რასაკვირველია, გამოსავალი არსებობს. საერთაშორისო თანამეგობრობის მუშაობის გაძლიერება ეფექტურია, მაგრამ მეორე მხრივ, პირდაპირი დიალოგის რეჟიმი უნდა შეიქმნას.
რუსეთის მხარე რაღაც თარიღთან დაკავშირებით გარკვეულ აქტიურობას იჩენს ხოლმე. ეს აქტიურობა არჩევნების გარდა, აბაშიძე-კარასინის შეხვედრას ემთხვევა ხოლმე“ - აღნიშნავს მამუკა არეშიძე.