,,ევროპული საქართველოს” ერთ-ერთი ლიდერის გივი თარგამაძის მანქანის აფეთქების საქმეზე სასამართლო პროცესი გაიმართა, რომელსაც უნდობლობის ნიშნად, თავად გივი თარგამაძე არ დაესწრო.
თარგამაძე გამოძიებას უნდობლობას უცხადებს და აღნიშნავს, რომ აპირებს გააგრძელოს საკუთარი გამოძიება, რათა დაადგინოს მის საქმეში ფიგურანტი ყველა პირი.
,,ვაპირებ გავაგრძელო საკუთარი გამოძიება. საკმაოდ შორს ვარ წასული. პრაქტიკულად ჩემთვის ცნობილია უშუალოდ ტერაქტის განმახორციელებელი ყველა პირი, ასევე ცნობილია დაკავშირებული პირები. ისინი გამოკვეთილია გამოძიებაშიც, მაგრამ მათ მიმართ არ ტარდება არც ოპერატიული და არც პროცესუალური მოქმედებები. ჩემთვის ასევე ცნობილია დაკვეთის მიმართულება, ეს არის როგორც რუსული, ასევე ქართული სპეცსამსახურები და პოლიტიკური ხელმძღვანელობა. ასევე ამ ქვეყნის არაფორმალური მმართველი ბიძინა ივანიშვილი. დასაზუსტებელი დამრჩა ის დამკვეთები, რომლებმაც ჩემი პერსონიფიცირება მოახდინეს, როგორც ტერორისტული აქტის ობიექტის და მოსაძიებელი მაქვს დამატებით მტკიცებულებები, რომლებიც ჩემი გამოძიების შედეგებს გაამაგრებს. ამას მე გავაკეთებ და მაშინ როდესაც სასამართლო იქნება იმ კონდიციაში, რომ ასეთი საქმეები განიხილოს, განიხილავს კიდეც,’’ - განაცხადა გივი თარგამაძემ.
თბილისის საქალაქო სასამართლომ გივი თარგამაძის ავტომობილის აფეთქების საქმეზე ბრალდებული, ძებნილი დარჩო ხეჩუაშვილი პატიმრობაში დატოვა.
დღევანდელ წინასასამართლო სხდომაზე ბრალდების მხარემ მოპოვებული მტკიცებულების ნუსხა წარადგინა და ხეჩუაშვილის მიმართ აღკვეთ ღონისძიებად კვლავ პატიმრობა მოითხოვა.
საქმის პროკურორის განცხადებით, ხეჩუაშვილი ამ დრომდე მიმალვაშია და მისი თავისუფლებაში ყოფნა მართლმსაჯულების წარმოებას ხელს შეუშლის.
რაც შეეხება დაცვის მხარეს, ხეჩუაშვილის უფლებადამცველის თქმით, დარჩო ხეჩუაშვილი მოსკოვშია სამუშაოდ წასული და მისთვის პატიმრობის გაუქმება უნდა მოხდეს..
შემდეგი სასამართლო სხდომა ხვალ, 4 ივლისს 16:00 საათზე გაიმართება.
