დემირელის კოლეჯის დაკავებული მენეჯერის, მუსტაფა ემრე ჩაბუქის მეუღლე, თუბა ჩაბუქი სპეციალურ დაცვას ითხოვს და აცხადებს, რომ ბოლო პერიოდში სოციალური ქსელების მეშვეობით გამუდმებით იღებს მუქარის მესიჯებს ამ დრომდე დაუდგენელი პირებისგან.
თუბა ჩაბუქის თქმით, მას და მისი ოჯახის წევრებს საფრთხე ემუქრებათ, ამიტომ ოჯახის ადვოკატი შესაბამის სამსახურებს დაცვის გამოყოფის მოთხოვნით მიმართავს.
"გახშირდა სოციალური ქსელის მეშვეობით მუქარები, რომელიც ვფიქრობ, საშიშროებას წარმოადგენს. ყველაფერს მასშტაბური ხასიათი აქვს. ჩემს ადვოკატს უკვე ვუთხარი, რომ მეშინია, ის მალე მიმართავს შესაბამის უწყებებს" - განაცხადა თუბა ჩაბუქმა.
შეგახსენებთ, რომ თუბა ჩაბუქის მეუღლე, მუსტაფა ემრე ჩაბუქი საქართველოში, თურქული მხარის მოთხოვნით, დაახლოებით თვენახევრის წინ დააკავეს. ოფიციალური ანკარა მას ტერორიზმთან კავშირს ედავება. მუსტაფა ემრე ჩაბუქს საქართველოში წინასაექსტრადაციო პატიმრობა აქვს შეფარდებული.
