შესაბამისი ორგანოების დასადგენია დაარღვია თუ არა საქართველოს კანონი შვიდკოიმ, - განაცხადა ჟურნალისტებთან საგარეო საქმეთა მინისტრმა. მიხეილ ჯანელიძის განცხადებით, ვლადიმერ პუტინის სპეციალურ წარმომადგენელ მიხეილ შვიდკოისთან არანაირი სამთავრობო შეხვედრები არ იგეგმება.
„არანაირი სამთავრობო შეხვედრები არ იგეგმება. როგორც მოვისმინე, ეს ადამიანი არის პირადი ვიზიტით ჩამოსული საქართველოში. არის თუ არა რაიმე დარღვევა რეჟიმის, ეს შესაბამისი ორგანოების დასადგენია. საქართველო არის სამართლებრივი სახელმწიფო და შესაბამისად, ყველა უწყება მოქმედებს კანონის შესაბამისად, და ამ შემთხვევაშიც შესაბამისი ნაბიჯები გადაიდგმება“, - აღნიშნა ჯანელიძემ.
რუსეთის კულტურის ყოფილი მინისტრი და ჟურნალისტი მიხაილ შვიდკოი თბილისში საერთაშორისო სამხრეთკავკასიურ მედიაფორუმზე საპატიო სტუმრის სტატუსით იმყოფება. შვიდკოი წყნეთში არასამთავრობოებსა და ჟურნალისტებს შეხვდა, სადაც კიდევ ერთხელ ისაუბრა კრემლის პოზიციის შესახებ ოკუპირებულ ტერიტორიებთან დაკავშირებით. გამართულ პრესკონფერენციაზე კი, მან აღნიშნა, რომ მოსკოვს, 2008 წელს ოკუპირებულ აფხაზეთსა და ცხინვალზე პოზიციები არ შეუცვლია. ის, მეორე დღეა, საქართველოში იმყოფება.
