შვიდკოისთან ვისაუბრეთ მხოლოდ კონკრეტულ, პირადულ საკითხებზე, - აცხადებს რუსეთთან ურთიერთობის საკითხში პრემიერის სპეციალური წარმომადგენელი ზურაბ აბაშიძე რუსეთის კულტურის ყოფილი მინისტრ და ჟურნალისტ მიხაილ შვიდკოის საქართველოში ვიზიტის შესახებ.
„თბილისში ჩატარდა მედიაფორუმი. ამ ფორუმის შესახებ ჩვენ მედიის საშუალებით გავიგეთ, შესაბამისად, მთავრობას ამ ფორუმთან არანაირი შეხება არ აქვს. არასამთავრობო ორგანიზაციებმა ჩაატარეს ეს ფორუმი, რომელშიც მონაწილეობა მიიღეს საქართველოს, სომხეთის, აზერბაიჯანის, რუსეთის წარმომადგენლებმა. იქ იმყოფებოდნენ ბატონი შვიდკოიც, რამდენიმე რუსი ჟურნალისტიც. ამ ხალხთან ჩვენ რაიმე ოფიციალური შეხვედრები ან მე ან მთავრობის რომელიმე წარმომადგენელს არ ჰქონია. მე მქონდა პირადი კომუნიკაცია ბატონ შვიდკოისთან. მას დიდი ხანია ვიცნობ და ვთქვი კიდეც გუშინ, რომ ვაპირებდი მასთან მქონოდა პირადი კომუნიკაცია. ვისაუბრეთ კონკრეტულ პირადულ საკითხებზე, რომლებიც ეხება კერძო პირებს, ადამიანებს, ჩვენს მოქალაქეებს, რომლებსაც დახმარება ან მხარდაჭერა სჭირდებათ. არ იყო რუსულ-ქართულ ურთიერთობებზე საუბარი. არავითარი ოფიციალური თემები არ განგვიხილავს.
სხვა პირადული შეხვედრებიც მქონდა გუშინ - ოჯახის წევრებთან, შვილიშვილებთან, თუ გინდათ, ამაზეც მოგიყვებით. შვიდკოი საქართველოში პირველად არ ჩამოსულა. ოკუპირებული ტერიტორიების შესახებ კანონი მას არ დაურღვევია. მას აქ მეგობრები, ნათესავები ჰყავს. იგი წლების მანძილზე იყო კულტურის მინისტრი და დიდი ხანია, ვიცნობ. წმინდა ადამიანური შეხვედრა იყო და ოფიციალური თემები და საკითხები არ განგვიხილავს" - აღნიშნა აბაშიძემ.
ამასთან, აბაშიძე რუსი ჟურნალისტის, ვლადიმერ მამონტოვის თბილისში ჩამოსვლის ფაქტსაც გამოეხმაურა, რომელმაც 2009 წელს ოკუპაციის შესახებ კანონი დაარღვია.
„ვერ გეტყვით, მამონტოვს არ ვიცნობ საერთოდ. ტელევიზიით გავიგე იმის შესახებ, რომ თითქოს კანონი აქვს დარღვეული. აქ არის ასეთი თემა - ამ დანაშაულის ხანდაზმულობის ვადის საკითხი. თუ მან 2009 წელს დაარღვია ეს კანონი. სპეციალისტები იტყვიან უფრო ზუსტად ამაზე. მე არ დავინტერესებულვარ მამონტოვთან დაკავშირებით დეტალურად“, - აღნიშნა ზურაბ აბაშიძემ.
რუსეთის კულტურის ყოფილი მინისტრი და ჟურნალისტი მიხაილ შვიდკოი თბილისში საერთაშორისო სამხრეთკავკასიურ მედიაფორუმზე საპატიო სტუმრის სტატუსით იმყოფება. შვიდკოი წყნეთში არასამთავრობოებსა და ჟურნალისტებს შეხვდა, სადაც კიდევ ერთხელ ისაუბრა კრემლის პოზიციის შესახებ ოკუპირებულ ტერიტორიებთან დაკავშირებით. გამართულ პრესკონფერენციაზე კი, მან აღნიშნა, რომ მოსკოვს, 2008 წელს ოკუპირებულ აფხაზეთსა და ცხინვალზე პოზიციები არ შეუცვლია. ის, მეორე დღეა, საქართველოში იმყოფება.