არსებობს კონკრეტული ნაბიჯები, რათა მიღებული იყოს კონსენსუსზე დაფუძნებული კონსტიტუცია, - ამის შესახებ ვენეციის კომისიის პრეზიდენტმა ბათუმში განაცხადა.
“არსებობს კონკრეტული ნაბიჯები ამ სიტუაციიდან გამოსვლისთვის, მაგრამ მე არ უნდა ვამბობდე მათ შესახებ. ეს კითხვა პოლიტიკურ პარტიებს უნდა დაუსვათ. კონკრეტული ნაბიჯები სწრაფი უნდა იყოს, უნდა არსებობდეს წინ წასვლის საერთო განზრახვა კომპრომისის მიღწევის საფუძველზე. ასევე გამონახული უნდა იყოს პროცედურული გადაწყვეტილებები, რათა მიღებული იყოს კონსენსუსზე დაფუძნებული კონსტიტუცია“, - განაცხადა ჯანი ბუკიკიომ.
მისივე თქმით, საკონსტიტუციო რეფორმის პროცესში მთავრობამ „ბევრი გააკეთა“.
,,მე არ ვიცი, საქართველოს მთავრობამ რა კომპრომისს მიაღწია, როგორც თქვენ ამას მეუბნებით. ვაღიარებ, რომ მათ ბევრი გააკეთეს, მათ შეთავაზეს რიგი მნიშვნელოვანი ცვლილებები, მაგალითად, საარჩევნო სისტემასთან დაკავშირებით. პოლიტიკური პარტიისთვის, რომელმაც არჩევნები არსებული სისტემით მოიგო, საარჩევნო სისტემის პროპორციულით შეცვლა სარისკოა, ვინაიდან მათ შეუძლიათ ადგილები და ხელისუფლებაც დაკარგონ. ეს კარგი ნაბიჯი იყო, მაგრამ ამის გადავადება შვიდი წლით არ არის საუკეთესო გადაწყვეტილება“, - განაცხადა ვენეციის კომისიის პრეზიდენტმა.