საკონსტიტუციო ცვლილებებზე მუშაობის შეწყვეტისა და პროცესის ხელმეორედ დაწყების მოთხოვნა მმართველი გუნდისთვის გაუგებარია.
,,როდესაც ვენეციის კომისიის თავმჯდომარე ყველა პოლიტიკურ ძალას კონსენსუსისკენ მოგვიწოდებს, ოპოზიციური პარტიები ითხოვენ საკონსტიტუციო რეფორმის ჩაშლას და ცვლილებების პროექტის გამოწვევას პარლამენტიდან. აქედან გამომდინარე, შეუძლებელია არ დავეთანხმოთ ბატონ ჯანი ბუკიკიოს განცხადებას იმასთან დაკავშირებით, რომ შექმნილია ჩიხური სიტუაცია, კრიზისია კონსენსუსთან მიმართებით. ოპოზიციურმა პარტიებმა თავიდანვე აირჩიეს ურთიერთობის ისეთი გზა, რაც იმთავითვე გამორიცხავდა კონსენსუსის შესაძლებლობას და სწორედ ამის გამოა, რომ ისინი დღეს შეთანხმებისკენ მოწოდების შემდეგ აკეთებენ არაადეკვატურ განცხადებებს. არ შეიძლება აქვე არ აღინიშნოს, რომ ტყუილებსაც არ ერიდებიან და აცხადებენ, რომ პროექტის შეცვლილი ვერსიაა მიღებული. რეალურად მიღებული იყო სიტყვა-სიტყვით იგივე დოკუმენტი, რაც მოიწონა ვენეციის კომისიამ. უფრო მეტიც, გათვალისწინებულია მათი პრაქტიკულად ყველა რეკომენდაცია. ერთადერთი ცვლილება შეეხო გარდამავალი დებულების კონკრეტულ მუხლს - არა პროპორციულ არჩევნებს, არამედ მის ერთი ვადით გადაწევას”, - განაცხადა მამუკა მდინარაძემ.
ოპოზიციური პარტიების წარმომადგენლების განცხადებით, ვენეციის კომისიის თავმჯდომარემ, ჯანი ბუკიკიომ ეს იდეა მოიწონა. მათი განცხადებით, ჯანი ბუკიკიო კონსტიტუციის მეორე მოსმენით მიღებული პროექტის უკან გამოწვევაზე თანახმაა.
ოპიზიციურმა პარტიებმა შეხვედრის დასრულების შემდეგ ერთობლივი განცხადება გააკეთეს და აღნიშნეს, რომ მმართველ გუნდთან დიალოგის სუფთა ფურცლიდან დაწყებისთვის მზად არიან. ოპოზიცია „ქართულ ოცნებას“ დიალოგისკენ კიდევ ერთხელ მოუწოდებს.