საპარლამენტო უმრავლესობის წარმომადგენელის აკაკი მინაშვილის განცხადებით, "ფრიდომ ჰაუსის" მიერ გამოქვეყნებულ დასკვნაში არსად არ წერია, რომ დღეისთვის ქვეყანაში არსებული კორუფციის დონეს შევარდნაძის დროინდელ პერიოდის მსგავსია.
ამის შესახებ განცხადება აკაკი მინაშვილმა დღეს პარლამენტში ჟურნალისტებთან საუბრისას "ფრიდომ ჰაუსის" დასკვნის კომენტარისას გააკეთა.
"საქართველო მოხსენიებულია იმ წარმატებულ ქვეყანათა რიგში, რომლებიც რეფორმებს წარმატებულად ახორციელებენ. მათ შორის კორუფციის დაძლევის, მედიის თავისუფლების, სასამართლო რეფორმის, საარჩევნო კანონმდებლობის დახვეწის და ზოგადად დემოკრატიული რეფორმების განხორციელების თვალსაზრისით", - განაცხადა მინაშვილმა.
მისივე თქმით, დასკვნაში აღნიშნულია, რომ მედიამ მიაღწია წარმატებას, თუმცა პრობლემად რჩება კერძო ტელევიზიებში სარედაქციო დამოუკიდებლობის ხარისხი, თუმცა მიაჩნია რომ ეს პრობლემაც დაძლევადია და ამაში საგანგაშო არაფერია.
"საერთო ჯამში ეს დასკვნა არის საკმაოდ პოზიტიური და არ მესმის იმ ინტერპრეტაქციების საფუძველი, თითქოს აქ რაიმე იყოს უარყოფითი ქვეყნის საწინააღმდეგოდ" - აცხადებს მინაშვილი.
