საქართველოს პარლამენტის თავმჯდომარის, ირაკლი კობახიძის განცხადებით, საქართველოში არიან ექსპერტები, რომლებიც, სამწუხაროდ, არ ჩანან, არიან ნამდვილი ექსპერტები და არიან იარლიყმიკერებული ექსპერტები, რომელთაც არამხოლოდ ანალიზი, არამედ კონკრეტული ტექსტების წაკითხვაც არ შეუძლიათ.
კობახიძემ ექსპერტები აჭარის კონსტიტუციასა და უშიშროების საბჭოსთან დაკავშირებული საკითხების გამო გააკრიტიკა.
„სად წაიკითხეს მათ, აჭარის მთავრობაში მინისტრთა რაოდენობა იზრდება? აქ საუბარი იმაზე კი არ არის, რომ ვიღაცები ვერ აანალიზებენ რაღაცებს - ვერ კითხულობენ. ეს არის პრობლემა ჩვენთან ე.წ. ექსპერტულ წრეებში. ეს არის პრობლემა, რომელიც აქვს ჩვენს ე.წ. ექსპერტულ საზოგადოებას“, - განაცხადა პარლამენტის თავმჯდომარემ.
ამასთანავე, კობახიძემ ექსპერტთა მოსაზრებას, რომ უშიშროების საბჭოს გაუქმება შეცდომაა და ჰიბრიდული ომის შემთხვევაში ქვეყანა დაუცველი რჩება, უპასუხა:
„ერთმა ექსპერტმა დაამტკიცოს, რომ დღეს რამეს აკეთებს ეროვნული უშიშროების საბჭო ჰიბრიდული ომის კუთხით. ეს კითხვა დავსვით ჩვენ შესაბამისი კომიტეტის სხდომაზე. ვერც ერთი ე.წ. ექსპერტი ამას ვერ ამტკიცებს იმიტომ, რომ დღეს ეროვნული უშიშროების საბჭო არაფერს არ აკეთებს ჰიბრიდული საფრთხეების კუთხით.
ეს არის დღევანდელი რეალობა. მე კიდევ ერთხელ შემიძლია გავიმეორო, რომ ეროვნული უშიშროების საბჭოს გაუქმება ნულოვან დონეზე აისახება ქვეყნის თავდაცვისუნარიანობასა და უსაფრთხოების სისტემაზე. ეს არის ის ორგანო, რომელიც აბსოლუტურად არის მოკლებული ფუნქციებს, ეს არის კონსტიტუციის სიმახინჯე და ესეც არის ერთ-ერთი სიმახინჯე კონსტიტუციის, რომელიც სწორდება.
ესენი არიან ე.წ. თავდაცვის თემი, რაღაც ტერმინებს იგონებენ. ადამიანები კითხვებს ვერ სვამდნენ კომიტეტის სხდომაზე და ეწოდებათ მათ, სამწუხაროდ, თავდაცის ექსპერტები. ჩვენი ამოცანაა კონსტიტუციის მოწესრიგება. ეს არის ჩვენი არჩევანი, ჩვენი პროგრამული პასუხისმგებლობა, ეს დაპირება ჩვენ მივეცით ამომრჩეველს 2016 წლის არჩევნების წინ რომ დაიხვეწებოდა, ქვეყნის ძირითადი კანონი და ეს დაპირება დღეს სრულდება როგორი ხელშემშლელი ფაქტორებიც არ უნდა იყოს, ხელს ვერავინ ვერ შეგვიშლის ამაში, ეს მიზანი აუცილებლად იქნება მიღწეული“ - განაცხადა პარლამენტის თავმჯდომარემ.
