პარლამენტმა ახალი საგადასახადო კოდექსის პროექტი პირველი მოსმენით მიიღო. ახალ საგადასახადო კოდექსს პარლამენტი საბოლოოდ მიმდინარე წლის ივლისში დაამტკიცებს, ხოლო ძალაში 2011 წლის 1-ლი იანვრიდან შევა.
ახალი საგადასახადო კოდექსის პროექტის მთავარ პრიორიტეტებად საგადასახადო სისტემის მიმართ ნდობის ამაღლება, გონივრული ადმინისტრირების განხორციელება, სტაბილური საგადასახადო გარემოს ჩამოყალიბება, ბიზნესის მაქსიმალურად ლეგალიზება, მცირე ბიზნესისთვის საგადასახადო ტვირთის შემსუბუქება და კანონის ირმაგი ინტერპრეტირების გამორიცხვა სახელდება.
ჩნდება ე. წ. მიკრობიზნესის დეფინიცია, რომელიც ყოველგვარი საგადასახდო ვალდებულებისგან იმ მიკრომეწამეების გათავისუფლებას ითვალისწინებს, რომელთა წლიური ბრუნვა 30 ათას ლარამდეა.
პარლამენტის და მთავრობის მტკიცებით, კოდექსზე მსჯელობა მისი მიღების შემდეგაც გაგრძელდება.
პარლამენტმა პირველი მოსმენით ცვლილება შეიტანა მოქმედ საგადასახადო კოდექსშიც, რომლითაც სატელეფონო საუბრები აქციზით იბეგრება, ხოლო სპირტიან სასმელებზე, მათ შორის ლუდზე, აქციზი ორმაგდება.
კენჭისყრამდე დეპუტატებმა აქცენტი უკვე განხილული და ცნობილი საკითხების გადამოწმებაზე გააკეთეს. უმრავლესობის წევრებმა მინისტრს სთხოვეს, კიდევ ერთხელ დაედასტურებინა ის გარემოება, რომ პრესის დაბეგვრა არ იგეგმება. ასევე, მინისტრმა კიდევ ერთხელ დაადასტურა, რომ კონკრეტულად სამედიცინო აპარატურის იმპორტი არ დაიბეგრება და აღარ დაიბეგრებიან უმაღლესი სასწავლებლები და კერძო სკოლები.
უმრავლესობის ეს მოთხოვნა ფინანსთა მინისტრმა დააკმაყოფილა. თუმცა არაფერი ითქვა ოპოზიის იმ შენიშვნებზე, რაც ახალი კოდექსის ახალ პრინციპებს უკავშირდება. ამასთან დაკავშირებით მხოლოდ ის კომენტარი კეთდება, რომ კოდექსზე მსჯელობა პროექტის საბოლოო დამტკიცებამდე გაგრძელდება.
