ზვიად გამსახურდიას გარდაცვალების ფაქტის შემსწავლელ დროებით საპარლამენტო კომისიას საქმიანობისთვის ვადა კიდევ ოთხი თვით გაუგრძელდა. კომისიის ვადის გახანგრძლივების შესახებ გადაწყვეტილება დღეს, პარლამენტის რიგგარეშე სესიაზე მიიღეს. Y
სხდომაზე კომისიის თავმჯდომარე კონსტანტინე გამსახურდიამ კომისიის მუშაობის მეორე შუალედური ანგარიში წარადგინა და საქმიანობისთვის ვადების გახანგძლივება მოითხოვა.
გამსახურდიას კომისიის დასკვნის მიხედვით, ექს-პრეზიდენტი არა საკუთარი ხელით, არამედ სხვა პირის მიერ გახორციელებული გასროლის შედეგად არის გარდაცვლილი.
კომისიას და მის ხელმძღვანელს კონსტანტინე გამსახურდიას ამ დასკვნის საფუძველს 1994 წლის 17 თებერვალს გვამის დათვალიერების ოქმის, როსტოვის სასამართლო-სამედიცინო ექსპერტიზის, ვიდეოფირის მასალებისა და ზოგიერთი სხვა მტკიცებულების ურთიერშეჯერებითი ანალიზი და მათ შორის არსებული წინააღმდეგობრივი გარემოებები აძლევს.
გამსახურდიას თქმით, როსტოვში ზვიად გამსახურდიას ნეშტზე 2007 წლის მარტში ჩატარებული სასამართლო-სამედიცინო ექსპერტიზის დასკვნით დასტურდება, რომ გასროლა ვერ გახორციელდებოდა თავად მის მიერ.
"ზემოდან ქვემოთ და წინიდან უკან მიმავალი გამჭოლი დაზიანება თავის ქალი მიმართ იარაღის ლულის ისეთ პოზიციაზე მიუთითებს, რომლისგანაც საკუთარი თავის მიმართ გასროლის გახორციელება ფიზიკურად შეუძლებელია. გარდა ამისა, ყურადღებას იპყრობს ნეკნებისა და სხვა ძვლების დაზიანებები. ექსპეტრიზის ავტორები ვარაუდობენ, რომ ეს დაზიანებები შესაძლოა გრუნტის სიმძიმის ქვეშ კუბოს ფიცრების დაწოლის შედეგად წარმოიშვა, თუმცა გამორიცხული არ არის, ისინი ფიზიკური ძალადობის შედეგიც ყოფილიყო'', - აღნიშნა გამსახურდიამ.
