რუსეთის ფედერაციის საგარეო საქმეთა სამინისტროს ოფიციალური წარმომადგენელი ანდრეი ნესტერენკო აშშ-სთან ამჟამად არსებულ ჯაშუშურ სკანდალთან დაკავშირებით აცხადებს, რომ რუსეთის ფედერაციის აზრით, აშშ-ს მიერ გავრცელებული ინფორმაცია არც არაფერს არ ეყრდნობა და იგი უსაფუძვლოა.
"ჩვენის აზრით ამგვარი ქმედებები უსაფუძვლოა და არაკეთილსინდისიერ მიზნებს ემსახურება. ჩვენთვის გაუგებარია მიზეზი იმისა, რამაც განაპირობა აშშ-ს იუსტიციის სამინისტროს მიერ ამგვარი განცხადების გაკეთება, რომელიც "ცივი ომის" დროის სულისკვეთებითაა დაწერილი", _ აცხადებს ნესტერენკო და დასძენს, რომ რუსეთის საგარეო საქმეთა სამინისტროს მხოლოდ სურს აღნიშნოს, რომ ასეთ გამოხტომებს არაერთხელ ჰქონია ადგილი მაშინ როდესაც რუსეთისა და აშშ-ს ურთიერთობები აღმავლობას განიცდიდა.
"ნებისმიერ შემთხვევაში კი ღრმა სინანულის ღირსია, რომ ყოველივე ეს ხდება თავად აშშ-ს ადმინისტრაციის მიერ გამოცხადებული აშშ-სა და რუსეთის ურთიერთობების "გადატვირთვის" დროს", _ აცხადებს ნესტერენკო.
