საქართველოს ოკუპირებული ტერიტორიებიდან იძულებით გადაადგილებულ პირთა განსახლებისა და ლტოლვილთა მინისტრის განცხადებით, თუ აფგან მუხთარლი იდევნებოდა, უნდა მოეთხოვა თავშესაფარი.
"ორი წელი ეს ადამიანი ცხოვრობდა საქართველოში ყოველგვარი პრობლემის გარეშე და მის მიმართ თუ დევნა იყო, ან ის რაიმე საფრთხეს გრძნობდა, შეეძლო მიემართა კონკრეტულად ჩვენი სამინისტროსთვის და მიეღო თავშესაფარი, ან მიემართა გაეროს ლტოლვილთა უმაღლესი კომისარიატისთვის. ის რომ მას არ მიუმართავს მაფიქრებინებს მე, რომ მის მიმართ მსგავსი დევნა არ არსებობდა", - ეს განცხადება სოზარ სუბარმა მთავრობის სხდომის დასრულების შემდეგ გააკეთა.
დღეს, ევროპარლამენტში აფგან მუხტარლის საქმეზე რეზოლუციას - "აფგან მუხტარლის საქმე და აზერბაიჯანში პრესის მდგომარეობა" - უყრის კენჭს. 16-პუნქტიანი დოკუმენტის პირველი 4 პუნქტი საქართველოს ეხება. რეზოლუციის პროექტში საქართველოში აზერბაიჯანელი ჟურნალისტის გაუჩინარება გატაცებადაა შეფასებული.
აფგან მუხთარლი თბილისიდან 29 მაისს გაუჩინარდა. მას ბაქოს საქალაქო სასამართლომ წინასწარი სამთვიანი პატიმრობა მიუსაჯა, პროკურატურამ ბრალი კონტრაბანდის, სახელმწიფო საზღვრის უკანონო გადაკვეთის და პოლიციისთვის დაუმორჩილებლობის მუხლებით წარუდგინა.
საქართველოში შსს-მ გამოძიება სისხლის სამართლის კოდექსის 143-ე მუხლით დაიწყო, რაც თავისუფლების უკანონო აღკვეთას გულისხმობს.
