საქართველოს პარლამენტის ვიცე სპიკერის თამარ ჩუგოშვილის განცხადებით, კონსტიტუციის ახალი პროექტი, რომელსაც პარლამენტი უყრის კენჭს, სრულ შესაბამისობაში იქნება ვენეციის კომისიის დასკვნასთან.
მისივე თქმით, საკონსტიტუციო ცვლილებებთან დაკავშირებით კომისიის ყველა რეკომენდაცია გათვალისწინებული იქნება.
„ამ სესიაზე განხილული იქნება ის დასკვნა, რომელიც ვენეციის კომისიამ მოამზადა ჩვენს საკონსტიტუციო ცვლილებებთან დაკავშირებით. ჩვენ თავიდანვე გვქონდა დადებული პირობა, რომ გავითვალისწინებდით ვენეციის კომისიის ყველა რეკომენდაციას, ამ პირობას მივყვებით რა თქმა უნდა, ბოლომდე და ვასრულებთ და შესაბამისად, კონსტიტუციას, რომელსაც პარლამენტი უყრის კენჭს, იქნება სრულ შესაბამისობაში ევროპულ სტანდარტებთან, იქნება გამართული დოკუმენტი და ჩვენი ქვეყნისთვის იქნება ძალიან კარგი კონსტიტუცია,“ - განაცხადა თამარ ჩუგოშვილმა და აღნიშნა, რომ მაჟორიტარული სისტემის გაუქმებასთან დაკავშირებით შეთანხმება მიღწეული ამ დრომდე არ არის.
„ვენეციის კომისიასთან ჩვენ ეს ნათქვამი გვაქვს, მათ იციან, რომ ჩვენ შესაძლებელია ორ ნაბიჯად გადასვლა დაგვჭირდეს ამ სისტემაზე, ზუსტად იმის გამო, რომ გუნდის წევრების ნაწილი პრინციპულად წინააღმდეგია და დარწმუნებული ვარ, რომ ამაში კომისიის მხრიდან პრობლემა არ იქნება დანახული,“ - განმარტა ჩუგოშვილმა.
ცნობისთვის, საქართველოს პარლამენტის თავმჯდომარე ირაკლი კობახიძე და ვიცე სპიკერი თამარ ჩუგოშვილი, ვენეციის კომისიის პლენარულ სესიას დაესწრებიან.
