„დაზარალებულის სტატუსის შეძენა არ ნიშნავს უფლებას გაეცნო სისხლის სამართლის საქმის მასალებს“, - ამის შესახებ “ქართული ოცნების“ თავმჯდომარემ მამუკა მდინარაძემ აზერბაიჯანელი ჟურნალისტის, აფგან მუხთარლის ადვოკატის მოთხოვნაზე - ჟურნალისტსა და მიმ მეუღლეს დაზარალებულის სტატუსი მიენიჭოთ, საუბრისას განაცხადა.
დეპუტატი განმარტებით, არსებული კანონმდებლობით, დაზარალებულის სტატუსი მხარეს სისხლის სამართლის საქმის გაცნობის შესაძლებლობას არ აძლევს.
„ნამდვილად არ იქნება კარგი, რომ გარკვეული იურიდიული ნიუანსები და ამ იურიდიული ნიუანსების განუმარტველობიდან გამომდინარე, შეცდომაში შევიდნენ ოჯახის წევრები. რადგან, დაზარალებულის სტატუსის შეძენა არ ნიშნავს უფლებას გაეცნო სისხლის სამართლის საქმის მასალებს. ჩვენ ვიცით, რომ „ნაციონალური მოძრაობის“ დროს შეტანილი ცვლილებების თანახმად და დღეს ეს ხარვეზი არ არის გამოსწორებული, პირადად ჩემი აზრია რომ დაზარალებულს უნდა ჰქონდეს საქმის მასალების გაცნობის უფლება. შესაბამისად, დაზარალებულის სტატუსი ასეთ უფლებას ცალსახად არ სძენს დაზარალებულ მხარეს,“ - განაცხადა მამუკა მდინარაძემ.
