„ევროპული საქართველოს“ წევრის, ოთარ კახიძის განცხადებით, კონსტიტუციით ქორწინების განსაზღვრა, როგორც ქალისა და მამაკაცის კავშირისა ოჯახის შექმნის მიზნით, რეალურად ჰომოფობიურ განწყობას კიდევ უფრო გააღვივებს და ლგბტ ადამიანების სტიგმატიზებას შეუწყობს ხელს.
როგორც კახიძემ "ჯი-ეიჩ-ენთან" საუბრისას აღნიშნა, ეს გადასწყვეტილება რუსული პროპაგანდის ნაწილია.
„ეს არის პირდაპირ რუსული პროპაგანდის ნაწილი, თითქოს არსებობს საფრთხე, რომელიც გვემუქრება ჩვენ და თუ კონსტიტუციით ამ საფრთხეს არ დავაზღვევთ, ვიღაც გარყვნილებას გვიქადის. რეალურად, ქორწინების საკითხი არ არის აქტუალური თემა, რადგან სამოქალაქო კოდექსით ისედაც განსაზღვრულია, რომ ქორწინება არის ქალისა და მამაკაცის კავშირი. შესაბამისად, მისი წამოწევა მხოლოდ აძლიერებს რუსულ პროპაგანდასა და ჰომოფობიურ განწყობას. ბუნებრივია, რომ ეს იწვევს ლგბტ პირების დამატებით სტიგმატიზაციას“, - განმარტა კახიძემ.
