დეკანოზ გიორგი მამალაძის ძმის თორნიკე მამალაძის მტკიცებით, მამა კახაბერ გოგოტიშვილი მას პატრიარქთან შეხვედრას დაპირდა.
,,მამა კახაბერს ვთხოვე და მივწერე ადვოკატებთან ერთად პატიარქთან შეხვედრაზე, რაზეც მივიღე პასუხი, რომ ჩემს თხოვნას გადასცემდა პატრიარქს და გამაგებინებდა პასუხს. მეორე დღეს მომივიდა პასუხი, რომ პატრიარქი მზად არის შეხვედრისთვის. იქ არ უთქვამს, რომ ადვოკატები არ იყვნენ ნახსენები ან პატრიარქი ამბობს უარს ადვოკატების მიღებაზე. აქედან გამომდინარე, ჩავთვალე, რომ პატრიარქი მიგვიღებდა ადვოკატებთან ერთად. ამის შემდეგ, რატომღაც, საპატრიარქოდან ვიღაცას შეეშინდა პატრიარქთან ადვოკატების მისვლის და საქმის დეტალების გაგების და დაბლოკეს ადვოკატები”, - განაცხადა თორნიკე მამალაძემ.
მისი თქმით, ოჯახს კვლავ აქვს სურვილი ადვოკატებთან ერთად შეხვდეს პატრიარქს.
”ელემენტარულად ადამიანს კითხვა, რომ გაუჩნდეს საქმესთან დაკავშირებით, მე ვერანაირ პასუხს ვერ გავცემ, ვინაიდან საქმის დეტალებს არ ვიცნობ გასაიდუმლოების გამო. წინა შემთხვევაში მივიღე პასუხი, რომ პატრიარქი შეხვდებოდა მხოლოდ ოჯახის წევრებს და ამას ექნებოდა დალოცვითი ფორმა, რაზეც იცით, რომ უარი განვაცხადე. უწმინდესთან შეხვედრა, რა თქმა უნდა, ბედნიერებაა, მაგრამ ამ შემთხვევაში, ვითარება ისეთია, რომ გვინდა მხოლოდ დალოცვითი ფორმა არ იყოს”, - განაცხადა თორნიკე მამალაძემ.
მისივე თქმით, მას აინტერესებს რატომ შეცვალა პატრიარქმა გერმანიიდან ჩამოსვლის შემდეგ დეკანოზთან მიმართებით პოზიცია და ასევე იშუამდგომლებს, რომ პატრიარქი შეხვდეს მამა გიორგის.
