რუსეთმა ევროსაბჭოში საწევროს მესამედის გადახდაზე უარი თქვა. თანხის ოდენობა დაახლოებით 11 მილიონი ევროა. ხელისუფლების გადაწყვეტილებას მხარი ფედერაციის საბჭოს სპიკერმა ვალენტინა მატვიენკომ და საგარეო საქმეთა მინისტრმა სერგეი ლავროვმაც დაუჭირეს. ევროსაბჭოს პრესსამსახურის ინფორმაციით, მოსკოვს ოფიციალური შეტყობინება ორგანიზაციისთვის ჯერ არ გაუგზავნია. 2014 წელს ყირიმის ანექსიის გამო ევროსაბჭოს საპარლამენტო ასამბლეამ რუსეთის დელეგაციას სანქციები დაუწესა და სესიებზე ხმის უფლება ჩამოართვა. პასუხად, რუსეთმა ევროსაბჭოს საპარლამენტო ასამბლეის მუშაობაში მონაწილეობაზე უარი განაცხადა მანამდე, ვიდრე მის დელეგაციას უფლებამოსილება არ აღუდგება.
